Skrifstofa borgarstjóra og borgarritara
Kjarnahlutverk skrifstofu borgarstjóra og borgarritara felst í þjónustu við embætti borgarstjóra og borgarritara, styðja við framgang áherslumála borgarstjóra, samhæfa verkefni þvert á stjórnsýslu Reykjavíkurborgar og leiða framgang stefnumótandi verkefna. Skrifstofan ber jafnframt ábyrgð á miðlun upplýsinga, stafrænni markaðssetningu og persónuvernd.
Hlutverk
Skrifstofa borgarstjóra og borgarritara veitir borgarstjóra og borgarritara faglega þjónustu og stuðning við störf þeirra. Þjónustu- og stjórnsýsluteymi skrifstofunnar ber ábyrgð á beinni þjónustu við borgarstjóra og undirbúningi og eftirfylgni mála sem fara fyrir borgarráð og önnur fagráð Reykjavíkurborgar ásamt því að samhæfa verkefni sem ná þvert á svið og starfseiningar borgarinnar.
Skrifstofan leiðir og styður við framgang stefnumótandi verkefna og áherslumála borgarstjóra á sviðum stjórnsýsluþróunar, stefnumótunar, alþjóðamála og annarra málaflokka sem henni eru falin. Jafnframt sinnir skrifstofan persónuvernd og verkefnastjórnun og stuðlar að samræmdri framkvæmd verkefna innan stjórnsýslunnar.
Skrifstofan ber ábyrgð á miðlun upplýsinga um starfsemi borgarinnar, stafrænum samskiptum, markaðssetningu og samfélagsmiðlum. Í þeirri vinnu er lögð áhersla á skýra upplýsingagjöf, gagnadrifna nálgun og virkt samtal við íbúa og aðra hagsmunaaðila.
Gildi skrifstofunnar eru fagmennska, þjónusta og samvinna.
Leiðarljós skrifstofunnar: Við erum framsækin, veitum áreiðanlega þjónustu og sinnum verkefnum okkar af fagmennsku.
Borgarstjóri
Borgarstjórinn í Reykjavík er æðsti yfirmaður starfsmanna Reykjavíkurborgar. Borgarstjóri gegnir þremur meginhlutverkum.
Hann er framkvæmdastjóri Reykjavíkurborgar, fulltrúi Reykjavíkurborgar á opinberum vettvangi og pólitískur leiðtogi meirihlutans.
Borgarritari
Borgarritari er æðsti embættismaður borgarinnar að undanskildum borgarstjóra og einn af staðgenglum hans.
Undir embætti borgarritara heyrir skrifstofa borgarstjóra og borgarritara.
