Framkvæmdir í Laugarnesskóla
Skýringarmyndir
Hvað verður gert?
Undanfarin misseri hafa verið umtalsverðar mótvægisaðgerðir í skólanum vegna leka- og mygluvandamála. Þær miða að því að fjarlægja rakaskemmt byggingarefni, stoppa lekaleiðir og þétta eins og kostur er. Þeim fylgja þá ítarleg þrif og jafnan er lofthreinsitækjum komið fyrir á viðeigandi stöðum. Mótvægisaðgerðirnar eru hugsaðar til þess að tryggja áframhaldandi skólastarf meðan undirbúnar eru stærri og viðameiri framkvæmdir. Mótvægisaðgerðum er nú lokið í Laugarnesskóla en þeim áfram fylgt eftir.
Stóru verkefni skólans lúta þá að þéttingu veðurhjúps og ytra byrði elsta hluta skólans. Samhliða þarf að uppfæra loftræstingu og endurnýja glugga svo eitthvað sé nefnt. Innra byrði verður þá mikið til endurnýjað. Ytra byrði hússins nýtur friðunar og verður þétting þess unnin í góðri samvinnu með Minjastofnun.
Samhliða endurnýjun í Laugarnesskóla er verið að hugsa grunnskólamál í Laugardal og Laugarnesi heildrænt og til framtíðar en ljóst er að nemendum fjölgar í hverfinu næstu ár. Greiningarvinna er langt komin og ættu niðurstöður að liggja fyrir ársbyrjun 2024.
Hvað mun þetta kosta?
Frumkostnaðaráætlun er í vinnslu.
Hvar er kennt á meðan?
Húsnæði KSÍ hefur gagnast skólanum til bráðabirgða á meðan unnið hefur verið að mótvægisaðgerðum. Verið er að undirbúa bráðabirgðahúsnæði fyrir starfsemi skólans þegar hann verður tekinn til heildarendurnýjunar.
Hvernig gengur?
Desember 2023
Tekin sýni til eftirfylgdar sem koma vel út og kalla almennt ekki á frekari mótvægisaðgerðir.
September 2023
Mótvægisaðgerðum og ítarlegum þrifum lokið. Undirbúningur heildarendurgerðar Laugarnesskóla í fullum gangi samhliða vinnu við bráðabirgðahúsnæði fyrir starf skólans á meðan framkvæmdatíma stendur.
Júlí 2023
Mótvægisaðgerðir í fullum gangi.
Júní 2023
Verkfræðistofan Efla lægstbjóðandi í verk- og byggingarstjórn verkefnisins í Laugarnesskóla.
Maí 2023
Boðin hefur verið út byggingarstjórn og eftirlit á framkvæmdum við Laugarnesskóla. Niðurstöður útboðs liggja fyrir í lok mánaðar.
Apríl 2023
Drög lögð að aðgerðum sumarsins en áfram verður hugað að mótvægisaðgerðum og fyrirbyggjandi viðhaldi.
Mars 2023
Samtal við Minjastofnun virkjað vegna friðlýsingar á skólanum.
Fundað með foreldrasamfélagi og skólaráði Laugarnesskóla.
Janúar 2023
Mótvægisaðgerðir og greiningarvinna í fullum gangi. Tekin kjarnasýni úr útvegg til að fá betri mynd af ástandi steypunnar. Vinna hafin við útboð á byggingarstjórn verkefnisins.
Forsagan
Elsti hluti Laugarnesskóla er kominn vel á níræðisaldur og ytra byrði hans ásamt miðrými skólans í seinni byggingaráfanga er friðlýst. Greinargerð EFLU á rakaástandi og innivist skólans, sem hafa legið til grundvallar mótvægisaðgerðum, kom út í ágúst 2022.
Vantar þig meiri upplýsingar?
Áhersla er lögð á góða upplýsingamiðlun á framkvæmdatímanum.
- Umhverfis- og skipulagssvið Borgartúni 12-14 105 Reykjavík s. 411 1111
- Skóla- og frístundasvið Borgartúni 12-14 105 Reykjavík s. 411 1111
Hægt er að hafa samband í tölvupósti á netföngin usk@reykjavik.is og sfs@reykjavik.is ef einhverjar spurningar vakna.