Notendaskilmálar Reykjavíkurkorta

1. Samþykki skilmála

Með kaupum og/eða notkun Reykjavíkurkorts samþykkir korthafi að fylgja í hvívetna notkunarskilmálum þessum og samþykkir enn fremur að fylgja gildandi  öryggis- og umgengnisreglum á þjónustustöðum Reykjavíkurkorta.

2. Þjónustustaðir Reykjavíkurkorta

Eftirtaldir þjónustustaðir taka á móti Reykjavíkurkortum:

• Borgarsögusöfn Reykjavíkur: Árbæjarsafn, Aðalstræti, Ljósmyndasafn Reykjavíkur, Sjóminjasafn, Viðey
• Fjölskyldu- og Húsdýragarðurinn
• Listasöfn Reykjavíkur: Hafnarhús, Kjarvalsstaðir og Ásmundarsafn
• Sundlaugarnar í Reykjavík: Árbæjarlaug, Breiðholtslaug, Dalslaug, Grafarvogslaug, Klébergslaug, Laugardalslaug, Sundhöll Reykjavíkur, Vesturbæjarlaug
• Ylströndin

3. Notkunarheimildir Reykjavíkurkorta

Þar sem Reykjavíkurkortið er aðgangskort er framvísun kortsins nauðsynleg til notkunar. Ekki er mögulegt að óska eftir aðgangi með öðrum leiðum, s.s. uppflettingu á kennitölu í afgreiðslu nema gegn framvísan löggildra skilríkja. Aðgangskort er forsenda virkni áskrifta/inneigna.

Hér að neðan er fjallað um mismunandi tegundir af áskriftum sem hægt er að kaupa/hlaða inn á Reykjavíkurkortið. Til að fyrirbyggja misskilning er þó í öllum tilvikum nauðsynlegt fyrir korthafa sjálfa að eiga/kaupa aðgangskort. Frí áskrift jafngildir ekki fríu aðgangskorti. 

Inneign

• inneign á ákveðinn fjölda heimsókna
• gefið út á nafn og kennitölu einstaklings en notkun annarra einstaklinga heimil (gildir þó ekki fyrir hópa)
• gildistími inneignarkorta er 48 mánuðir frá kaupdegi

Áskrift

• gefið út á nafn og kennitölu ákveðins einstakling og er til einkanota fyrir korthafann  
• eru aðgreind fyrir börn/ungmenni, fullorðna, aldraða og aðra skilgreinda hópa
• kortið veitir aðgang að tilgreindum þjónustustöðum á gildistíma kortsins
• hægt er að nota kortið í sjálfsafgreiðsluhliðum tvisvar á dag en kjósi korthafi að nýta kortið oftar þarf að leita til afgreiðslu
• mynd er tekin af korthafa til auðkenningar (sé hann yfir 18 ára) en ef korthafi heimilar ekki myndatöku þarf hann að leita til afgreiðslu við hverja komu og framvísa löggildum skilríkjum

Fríkort 

• er tímabilskort (um þau gilda sömu skilmálar og árskort sbr. hér að framan) þar sem korthafi fær aðgang án endurgjalds og greitt er af stofnun eða fyrirtæki 
• korthafa er aðeins heimilt að nota fríkort einu sinni á dag

Hlunnindakort

• er tímabilskort (um þau gilda sömu skilmálar og árskort sbr. hér að framan) sem korthafi fær útgefið á þeim forsendum að hann sé starfsmaður Reykjavíkurborgar eða njóti sambærilegra hlunninda á grundvelli samkomulags, án endurgjalds fyrir korthafa
• skilyrði fyrir útgáfu ráðast af reglum Reykjavíkurborgar hverju sinni
• þegar hlunnindakort er notað er upplýsingum um notkun safnað og miðlað til þess sviðs á vegum borgarinnar sem starfsmaðurinn heyrir undir (eða samningsaðila) sem er greiðandi fyrir umrædda þjónustu
• korthafa er óheimil notkun hlunnindakorts eftir að hann lætur af störfum hjá Reykjavíkurborg eða missir hlunnindi af öðrum sökum. Í tilviki starfsmanna Reykjavíkurborgar er yfirmanni rétt að óska eftir lokun kortsins við sama tímamark til að koma í veg fyrir að slík notkun sé möguleg

4. Skyldur Reykjavíkurborgar og heimil frávik vegna lokana  

Reykjavíkurborg skuldbindur sig til að hafa þjónustustaði sína opna í samræmi við auglýsta opnunartíma þeirra. 

Reykjavíkurborg er þó heimilt að loka tilteknum þjónustustöðum í allt að 5 vikur í senn ef nauðsyn þykir, s.s. vegna viðhalds, vegna laga- eða stjórnvalsfyrirmæla eða annarra óviðráðanlegra atvika, án þess að það teljist vanefnd af hálfu Reykjavíkurborgar (áskilinn lokunartími).

5. Heimildir til að óska eftir frystingu korta

Ef fyrirhugað er að lokun á tilteknum þjónustustað vari í lengri tíma en áskilinn lokunartími hljóðar upp á skv. 4. gr.  getur korthafi árskorts óskað eftir því að leggja inn kortið tímabundið á meðan lokun varir umfram áskilinn lokunartíma.

Ef korthafi verður ófær um að sækja þjónustu á þjónustustað Reykjavíkurkorts vegna veikinda eða slyss á gildistíma korts getur korthafi, innan tveggja mánaða frá slysdegi eða frá því að veikindi hefjast og gegn framvísan læknisvottorðs, óskað eftir frystingu kortsins. Frysting tekur þá mið af tilgreindu tímabili ófærni í læknisvottorði, þó að hámarki í 2 mánuði. Aðeins er heimilt að frysta kortið einu sinni á hverju 12 mánaða tímabili. 

Ef staða korthafa breytist á gildistíma árskorts með þeim hætti að hann á rétt á að njóta betri kjara (afmarkast við öryrkja, eldri borgara, starfsmenn Reykjavíkurborgar) getur korthafi sótt um nýtt kort á bættum kjörum og óskað nafnabreytingar á eldra korti.  

Beiðni um nafnabreytingu eða frystingu Reykjavíkurkorts skal berast til netfangsins reykjavikurkort@reykjavik.is. 

6. Gjaldskrá

Reykjavíkurborg gefur út gjaldskrá fyrir þjónustustaði. Gjaldskrá er aðgengileg á heimasíðu Reykjavíkurborgar og á þjónustustöðum.

7. Skilareglur

Inneignakorti er ekki hægt að skipta yfir í árskort.

Ekki er boðið upp á að framselja árskort á aðra kennitölu (sbr. þó undantekningu í gr. 5).

8. Vanefndir, önnur viðurlög og lokun korta

Ef korthafi gerist brotlegur við notendareglur samkvæmt skilmálum þessum t.d. með því að hleypa öðrum inn á sínum aðgangi með óheimilum hætti, eða gerist sekur um alvarlegt og/eða ítrekuð brot gegn umgengisreglum á þjónustustað er Reykjavíkurborg heimilt: 

• að loka korti tímabundið fyrirvaralaust og án endurgreiðslu
• vanefnd skal að jafnaði leiða til tímabundinnar lokunnar í 3 mánuði
• tímabundin lokun felur einnig í sér tímabundið heimsóknarbann.

Ef korthafi virðir að vettugi tímabundna lokun korts og heimsóknarbann eða ef nauðsynlegt reynist að loka ítrekað korti sama korthafans er heimilt að loka kortinu út gildistíma þess. 

Verði einstaklingur uppvís að því að framvísa Reykjavíkurkorti (gildir ekki um inneignakort) sem skráð er á annan einstakling hefur Reykjavíkurborg heimild til að loka viðkomandi korti. 

Í tilvikum þar sem um er að ræða hlunnindakort eða fríkort er greiðanda jafnframt tilkynnt um lokun korts og ástæður hennar.  

9. Glötuð kort

Korthafi getur tilkynnt glatað kort á næsta þjónustustað eða sent póst á reykjavikurkort@reykjavik.is og fengið inneign sína flutta yfir á nýtt aðgangskort.

Greitt skal fyrir nýtt aðgangskort samkvæmt gjaldskrá hverju sinni.

Korthafi ber ábyrgð á allri notkun kortsins þar til beiðni um lokun hefur borist.

10. Fyrirspurnir

Allar fyrirspurnir varðandi Reykjavíkurkort sendist á netfangið reykjavikurkort@reykjavik.is. Einnig er hægt að hafa samband við skrifstofu menningar- og íþróttasviðs í síma 411-1111.

11. Persónuvernd

Um meðferð og vinnslu persónuupplýsinga af hálfu Reykjavíkurborgar gilda lög um persónuvernd og vinnslu persónuupplýsinga nr. 90/2018 (persónuverndarlög). Með því að samþykkja skilmála þessa veitir korthafi Reykjavíkurborg heimild til að vinna með gögn sem verða til við notkun Reykjavíkurkorta.

Vinnsla persónuupplýsinga í tengslum við notkun Reykjavíkurkorta fer fram af hálfu menningar- og íþróttasviðs Reykjavíkur. Megintilgangur vinnslu persónuupplýsinga er að veita þá þjónustu sem korthafi hefur óskað eftir og veitt er með framvísun Reykjavíkurkorts. Vinnslan byggir á upplýstu samþykki hins skráða.

Veiti korthafi ekki umbeðnar persónuupplýsingar getur það leitt til þess að ekki verði unnt að samþykkja umsókn um útgáfu korts. Þá á korthafi rétt á að draga samþykki sitt til baka hvenær sem er. Afturköllun samþykkis mun þó ekki hafa áhrif á lögmæti vinnslu persónuupplýsinga á grundvelli samþykkisins fram að afturkölluninni. Uppsögn vegna samnings um kort skal beina á netfangið reykjavikurkort@reykjavik.is. Þá er einnig unnt að hafa samband símleiðis í síma 411-1111. Aðgangur að vinnslu persónuupplýsinga er takmarkaður við það starfsfólk sem þurfa hann starfs síns vegna.

Reykjavíkurborg notar upplýsingar um nafn, mynd, kennitölu og netfang korthafa til að auðkenna hann í hliðum þjónustustöðva. Persónuupplýsingar þessar eru jafnframt unnar í þeim tilgangi að opna og endurútgefa glötuð kort ef við á, sem og til að framkvæma flutning á inneignum korthafa á milli auðkenniskorta, sé þess óskað. Þá kann Reykjavíkurborg að nota tengiliðaupplýsingar korthafa til að gera honum viðvart ef röskun verður á þjónustu og veita aðrar almennar upplýsingar um þjónustu.

Reykjavíkurborg mun einnig nýta persónuupplýsingar korthafa í því skyni að framkvæma tölfræðilegar greiningar í því skyni að bæta þjónustu og greina notkun, svo sem  til þess að sjá hversu margir gestir eru inni á hverjum þjónustustað hverju sinni.

Í þeim tilfellum sem starfsfólk Reykjavíkurborgar óskar eftir útgáfu Reykjavíkurkorts er persónuupplýsingum miðlað frá næsta yfirmanni til skrifstofu menningar- og íþróttasviðs Reykjavíkur svo unnt sé að gefa út kort í samræmi við reglur Reykjavíkurborgar um starfskjör. 

Korthafar geta á hvaða tíma sem er óskað eftir upplýsingum um þær persónuupplýsingar sem varðveittar eru í samræmi við ákvæði persónuverndarlaga.

Hafa má samband við persónuverndarfulltrúa Reykjavíkurborgar í síma 411-1111 eða með því að senda tölvupóst á netfangið personuverndarfulltrui@reykjavik.is.

12. Lög og varnarþing

Skilmálar þessir fara eftir íslenskum lögum, svo og öll mál sem rísa kunna af notkun nema um annað sé sérstaklega samið.

Rísi mál vegna brota á skilmálum þessum má reka það fyrir Héraðsdómi Reykjavíkur.

13. Gildistími

Skilmálar þessir gilda frá (15.4.2026)