Reykjavik
Hinsegin málefni
Í mannréttindastefnu Reykjavíkurborgar kemur fram að óheimilt er að mismuna fólki vegna kyns, kynhneigðar, kynvitundar, kyntjáningar eða kyneinkenna. Ekki skal ganga út frá því að allt fólk sé gagnkynhneigt og sís, meðal starfsfólks, þjónustuþega, í uppeldis- og tómstundastarfi, menntunar og menningarstarfi. Í aðgerðaráætlun í mannréttinda- og lýðræðismálum 2019-2023 má sjá verkefni sem varða hinsegin málefni.
Regnbogavottun Reykjavíkurborgar
Allir starfsstaðir Reykjavíkurborgar geta fengið regnbogavottun. Til þess að fá vottunina þarf starfsfólk að taka þátt í fræðslu um hinsegin málefni og rýna þjónustuna sem veitt er á starfsstaðnum. Að auki þarf að útbúa aðgerðaráætlun í þeim tilgangi að gera starfsstaðinn hinseginvænni.
Trans börn og skólar
Trans börn koma nú út bæði yngri og í meira mæli en áður og eru skólar sífellt að reka sig á það að vera ekki undir það búnir. Á þessari síðu hafa verið teknar saman upplýsingar um trans börn ásamt tvenns konar gátlistum, annars vegar fyrir skóla þar sem barn hefur nýlega komið út sem trans eða er að hefja nám við skólann, og hins vegar fyrir skóla sem vilja verða 'trans-vænir' óháð því hvort að þar séu trans nemendur. Einnig hefur verið útbúin stuðningsáætlun fyrir trans nemendur.
Hinsegin börn og skólar
Það eru hinsegin börn í öllum skólum og eru þau alls konar, rétt eins og önnur börn. Hinsegin börn eiga það þó sameiginlegt að falla út fyrir það sem telst normið hvað varðar kynhneigð, kyntjáningu, kyneinkenni og/eða kynvitund. Á þessari síðu má finna efni á borð við gátlista, skilgreiningar og um hinsegin fjölskyldur meðal annars.
Reykjavíkurborg og Samtökin '78
Reykjavíkurborg og Samtökin '78 gerðu árið 2021 samstarfssamning til þriggja ára. Samtökin '78 skuldbinda sig til þjónustu við hinsegin fólk í Reykjavík, en það felur í sér hinseginfræðslu fyrir börn og ungmenni í skóla- og frístundastarfi borgarinnar og ráðgjafaþjónustu fyrir hinsegin fólk og aðstandendur þeirra. Einnig felur samningurinn í sér samstarf í rekstri Tjarnarinnar á hinsegin félagsmiðstöð fyrir ungmenni. Það er hægt að óska eftir ráðgjöf og fræðslu frá Samtökunum ´78 fyrir nemendur á vef samtakanna, en þjónustan er endurgjaldslaus.
Einnig er í samningnum ákvæði um ókeypis hinseginfræðslu frá Samtökunum '78 til íþróttafélaga innan Íþróttabandalags Reykjavíkur.
Regnbogaborgir
Árið 2019 gerðist Reykjavíkurborg aðili að Rainbow Cities Network sem er vettvangur borga sem vinna á sviði hinsegin málefna. Markmið þess eru að deila reynslu og þekkingu, vinna saman, læra af hvort öðru og byggja upp tengsl.
Skýrslur, bæklingar og rannsóknir
Mannréttinda- og lýðræðisskrifstofa Reykjavíkurborgar.
- Árið 2022 skilaði starfshópur um stöðu kynja- og hinseginfræðslu í skóla- og frístundastarfi Reykjavíkurborgar skýrslu sem inniheldur upplýsingar um stöðu mála, rannsóknir, könnun á starfsfólk ásamt tillögum til úrbóta.
- Árið 2021 var gerð rannsókn á Kennsluefni fyrir kynja- og hinseginfræði í leik- og grunnskólum sem var styrkt af Nýsköpunarsjóði námsmanna.
- Árið 2021 skilaði starfshópur um ókyngreinda aðstöðu í skóla- og frístundahúsnæði Reykjavíkurborgar skýrslu sem inniheldur upplýsingar um stöðuna, stefnu borgarinnar ásamt tillögum til úrbóta.
- Árið 2021 gaf Reykjavíkurborg út bækling með leiðbeiningum og upplýsingum um Hvernig skal bregðast við spurningum um trans fólk í kyngreindum rýmum, á íslensku og ensku. Bæklingurinn var einnig gefin út á íslensku og pólsku
- Árið 2020 gáfu Reykjavíkurborg og Samtökin '78 út uppfærða útgáfu af bæklingnum Hvað er hinsegin? sem er bæði á íslensku og ensku, en einnig á pólsku: Co to jest Queer?
- Árið 2019 var gefinn út bæklingurinn Hinsegin fólk og heimilisofbeldi, sem er hluti af verkefninu Saman gegn ofbeldi
- Árið 2015 var gerð rannsókn á hinsegin kynfræðslu í grunnskólum Reykjavíkurborgar, Typpið mun finna þig: Gagnkynhneigð, grunnskólinn og hinsegin kynfræðsla
- Árið 2014 var gerð rannsókn á meðal hinsegin starfsfólks Reykjavíkurborgar, „Við erum alltaf gay. Ekki bara þegar hinum hentar“ Reynsla og upplifun hinsegin starfsfólks hjá Reykjavíkurborg
Hægt er að hafa samband við Svandísi Önnu Sigurðardóttur, sérfræðing skrifstofunnar í hinsegin- og jafnréttismálefnum til að bóka fræðslu eða fá frekari upplýsingar: svandisanna@reykjavik.is.