Gististaðir
Gististaðir eru staðir þar sem boðin er gisting að hámarki í 30 daga samfleytt í senn gegn endurgjaldi, svo sem á hótelum, gistiheimilum, gistiskálum, íbúðum og sumarhúsum, með eða án veitinga.
Rekstur gististaða
Samkvæmt gildandi deili-og aðalskipulagi Reykjavíkurborgar þá er rekstur gististaða aðeins leyfð á tilteknum svæðum innan borgarmarkanna. Umsækjandi skal því byrja á því að athuga hvort að rekstur viðkomandi gististaðar rýmist innan heimilda borgarinnar með því að senda inn fyrirspurn til skipulagsfulltrúa þar sem tilgreina þarf viðkomandi staðsetningu og fasteignanúmer.
Flokkun gististaða
Gististaðir skiptast í fjóra flokka, skv. lögum nr. 85/2007:
| Flokkur | Tegund gististaðar |
|---|---|
| Flokkur I | Heimagisting |
| Flokkur II | Gististaður án veitinga |
| Flokkur III | Gististaður með veitingum en þó ekki áfengisveitingum |
| Flokkur IV | Gististaður með áfengisveitingum |
Tegundir gististaða
Gististaðir skiptast í átta tegundir, skv. reglugerð nr. 1277/2016 um veitingastaði, gististaði og skemmtanahald:
| Tegund | Lýsing |
|---|---|
| Hótel | Gististaður þar sem gestamóttaka er aðgengileg allan sólarhringinn og veitingar að einhverju tagi framleiddar á staðnum. Fullbúin baðaðstaða skal vera með hverju herbergi. |
| Stærra gistiheimili | Gististaður með takmarkaða þjónustu þar sem leigð eru út 5 eða færri herbergi eða hefur rými fyrir 10 einstaklinga eða færri. Getur verið gisting á einkaheimili. Ekki er gerð krafa um handlaug í herbergjum. Gestir skulu hafa aðgang að fullbúinni baðaðstöðu. |
| Minna gistiheimili | Gististaður með takmarkaða þjónustu þar sem leigð eru út 5 eða færri herbergi eða hefur rými fyrir 10 einstaklinga eða færri. Getur verið gisting á einkaheimili. Ekki er gerð krafa um handlaug í herbergjum. Gestir skulu hafa aðgang að fullbúinni baðaðstöðu. |
| Gistiskáli | Gisting í herbergjum eða svefnskálum. Hér undir falla farfuglaheimili (hostel). |
| Fjallaskálar | Gisting í herbergjum eða í svefnskálum staðsett utan alfaraleiðar og almenningur hefur aðgang að, svo sem skálar fyrir ferðamenn, veiðiskálar og sæluhús. |
| Heimagisting | Gisting á lögheimili einstaklings eða einni annarri fasteign í hans eigu sem hann hefur persónuleg not af. |
| Íbúðir | Íbúðarhúsnæði sérstaklega ætlað til útleigu til gesta til skamms tíma (gististaður) og fellur ekki undir húsaleigulög. Hér undir falla starfsmannabústaðir og starfsmannabúðir þegar slíkar byggingar eru ekki leigðar út í tengslum við vinnusamning. Íbúðir félagasamtaka eru undanskildar. |
| Frístundahús | Hús utan þéttbýlis sem er nýtt til tímabundinnar dvalar. Orlofshús félagasamtaka, svo sem stéttarfélaga og starfsgreinafélaga, eru undanskilin. |
Gististaðir í flokkum II-IV
Gististaðir í Reykjavík í flokkum II-IV þurfa starfsleyfi frá Heilbrigðiseftirlitinu og rekstrarleyfi frá sýslumanninum á höfuðborgarsvæðinu.
Þeir þurfa að uppfylla kröfur í reglugerð nr. 941/2002 um hollustuhætti, með síðari breytingum, reglugerð nr. 724/2008 um hávaða, með síðari breytingum, og reglugerð nr. 737/2003 um meðhöndlun úrgangs, með síðari breytingum.
Ef gististaður býður upp á matvæli, þ.m.t. áfengi, þarf hann að uppfylla ákvæði reglugerðar Evrópusambandsins nr. 852/2004 um hollustuhætti er varða matvæli, með síðari breytingum (innleidd hér á landi með reglugerð nr. 103/2010) auk annarra reglugerða sem við eiga.
Heimagisting
Er gisting gegn endurgjaldi á lögheimili einstaklings eða í einni annarri fasteign sem hann hefur til persónulegra nota og er í hans eigu. Fjöldi útleigðra daga í báðum eignum samanlagt skal ekki fara yfir 90 daga á hverju almanaksári eða samanlagðar tekjur af leigu eignanna skulu ekki nema hærri fjárhæð en 2 milljónir króna.
Einstaklingur sem vill reka heimagistingu þarf að skrá starfsemina hjá sýslumanninum á höfuðborgarsvæðinu. Fari reksturinn yfir viðmið fyrir heimagistingu í lögum um veitingastaði, gististaði og skemmtanahald þarf að afskrá gististaðinn sem heimagistingu á vef sýslumanna og sækja um starfsleyfi hjá heilbrigðisnefnd og rekstrarleyfi frá sýslumanni (flokkur II-IV).
Þann 31. maí 2017 voru gerðar lagabreytingar á Alþingi á lögum um hollustuhætti og mengunarvarnir, nr. 7/1998. Lagabreytingarnar tóku gildi frá og með 1. júlí 2017. Ekki er lengur krafist starfsleyfis frá heilbrigðisnefndum fyrir heimagistingu í flokki I.
Heilbrigðiseftirlitið í Reykjavík hvetur leigusala til að fylgja almennum reglum hvað varðar hreinlæti, umgengni, viðhald, loftræstingu, öryggismál, ónæði og hávaða í því húsnæði sem er leigt út. Einnig er hvatt til árvekni á meðal leigusala vegna veggjalúsar.
Starfsleyfisskilyrði
Í vinnslu.