Fjölmenning og inngilding

Reykjavík er fjölmenningarsamfélag  

Reykvískt samfélag er í stöðugri þróun og verður sífellt fjölbreyttara meðal annars með tilliti til uppruna, þjóðernis, trúar- og lífsskoðana. Fólk flytur meira á milli landa vegna aukinnar alþjóðavæðingar en hátt í 25% íbúa Reykjavíkur eru af erlendum uppruna. 

Fjölmenningarlegt samfélag kallar á breyttar áherslur á flestum sviðum samfélagsins. Grundvallaratriði fyrir fjölmenningarsamfélög eru virðing fyrir fjölbreytileika, jafnrétti og innihaldsrík fjölmenningarleg samskipti.

Inngilding

Í fjölmenningarlegu samfélagi er litið á fjölbreytileika sem sjálfsagðan hlut og lögð er áhersla á inngildingu (e. inclusion). Inngilding felur í sér að viðurkenna og virða fjölbreytileikann og gera alltaf ráð fyrir honum. Inngilding snýr að því að virkja allt fólk til þátttöku og gefa fjölbreyttum hópi fólks kleift að taka þátt í ákvarðanatöku. 

Fjölbreytt mannlíf

Eitt af leiðarljósum Reykjavíkurborgar er að reykvískt samfélag fái að njóta fjölbreytni í mannlífi og menningu þar sem þekking, víðsýni, jafnrétti og gagnkvæm virðing einkenna samskipti fólks af ólíkum uppruna. Allar stofnanir borgarinnar þurfa að laga sig að fjölmenningarlegu samfélagi og útfæra stefnu Reykjavíkurborgar um fjölmenningarlegt samfélag í starfsáætlunum sínum. Þær skulu gera ráð fyrir innflytjendum bæði sem notendum og veitendum þjónustu og taka tillit til þarfa innflytjenda án þess að litið sé á þá sem einsleitan hóp.