Félagsmiðstöðvar

""

Í Reykjavík starfa margar félagsmiðstöðvar. Þær eru ýmist starfræktar í húsnæði grunnskólanna eða utan þeirra. Opnunartími fylgir að mestu starfsári grunnskólanna. Yfir sumartímann er megináhersla lögð á hópastarf og opnunartími auglýstur sérstaklega.

Félagsmiðstöðvar í Reykjavík

Í félagsmiðstöðvunum er boðið upp á uppbyggilegt frístundastarf fyrir 10–16 ára börn og unglinga í frítímanum. Áhersla er lögð á að ná til þeirra unglinga sem þarfnast félagslegs stuðnings og að bjóða upp á fjölbreytileg viðfangsefni. Unnið er í klúbbum, sértæku hópastarfi, opnu starfi og tímabundnum verkefnum. Nánari upplýsingar um opnunartíma félagsmiðstöðvanna eru á heimasíðum þeirra. 

Sértækt frístundastarf

Í fjórum félagsmiðstöðvum er boðið upp á sértækt starf fyrir fötluð börn og unglinga; Öskju, Hellinum, Hofinu og Höllinni. Þar er opið eftir að skóladegi lýkur eða frá kl. 13:40–17:00 alla virka daga. Þá er opið í skólafríum frá kl. 08:00–17:00, en lokað er í vetrarfríum. Sótt er um sértækt frístundastarf á vef Völu frístund.

 

Unglingalýðræði

Félagsmiðstöðvastarfið byggir á hugmyndafræði unglingalýðræðis sem á að tryggja áhrif þeirra á starfið. Rammar unglingalýðræðis eru landslög, ákvarðanir borgaryfirvalda og fjárhagsáætlun félagsmiðstöðvarinnar.

Til að tryggja samráð við börn og unglinga um málefni félagsmiðstöðvarinnar er kosið með lýðræðislegum hætti í ráð og nefndir, skapaður opinn vettvangur þar sem öllum áhugasömum gefst tækifæri til að taka þátt og einstaklingar eða hópar fá að fylgja eftir eigin hugmyndum frá upphafi til enda.