Hagaskóli
Grunnskóli, 8.-10. bekkur
Fornhagi 1
107 Reykjavík
Skóladagurinn í Hagaskóla
- Kennsla hefst kl. 9:00 samkvæmt stundaskrá alla daga
- Stundaskrá er aðgengileg í Mentor
- Hafragrautur er í boði fyrir nemendur í matsal frá kl. 8:30
- Skrifstofan er opin kl. 8:00-15:00, sími 411 6700
Skóladagatal
Í skóladagatali Hagaskóla eru skipulagsdagar skráðir ásamt öðrum mikilvægum upplýsingum fyrir nemendur, foreldra og forráðamenn. Skóladagatal 2024-2025 er birt með fyrirvara um samþykki Skóla- og frístundaráðs.
Matur í grunnskólum
Skólamáltíðir eru gjaldfrjálsar veturinn 2024-2025 en mikilvægt er fyrir skólann að hafa áfram yfirsýn, halda utan um upplýsingar um ofnæmi og óþol og takmarka matarsóun. Því þarf eins og áður að skrá nemendur í mataráskrift.
Þeir nemendur sem voru skráðir í fyrra verða sjálfkrafa skráðir í áskrift en aðrir þurfa að skrá sig. Breyting á skráningu fer fram á matur.vala.is.
Um Hagaskóla
Skólahverfi Hagaskóla er allur Vesturbærinn, frá flugvelli og Lækjargötu út að Seltjarnarnesi. Tvísetningu lauk 1976 og varð þá kleift að vinna við eðlilegar aðstæður í Hagaskóla. Auk heimafólks hafa jafnan verið allmargir nemendur utan hverfis í skólanum.
Hagaskóli hefur þá sérstöðu meðal annarra Reykjavíkurskóla að vera stór safnskóli eingöngu fyrir unglingastig, það er 8., 9. og 10. bekk. Í Hagaskóla koma nemendur úr þremur skólum, Grandaskóla, Melaskóla og Vesturbæjarskóla. Árgangar eru því nokkuð fjölmennir og skólaárið 2023–2024 verða rúmlega 600 nemendur í skólanum. Þessi fjöldi gerir skólanum kleift að bjóða upp á margvíslegt val í námi.
Félagsmiðstöðin Frosti er fyrir nemendur skólans og býður upp á fjölbreytt og skemmtilegt starf fyrir unglinga.
Fimm skólastjórar hafa leitt starfið í skólanum frá stofnun hans:
- Árni Þórðarson 1958–1967
- Björn Jónsson 1967–1994
- Einar Magnússon 1994–2007
- S. Ingibjörg Jósefsdóttir 2007–2023
- Ómar Örn Magnússon 2023–
Stjórnendur í Hagaskóla
Skólastjóri er Ómar Örn Magnússon
Aðstoðarskólastjóri er Sigríður Nanna Heimisdóttir
Deildarstjóri nemendaþjónustu er Áslaug Pálsdóttir
Deildarstjóri upplýsinga og skólaþróunar er Tryggvi Már Gunnarsson
Skrifstofustjóri er Sigurlaug María Hreinsdóttir
Farsæld barna
Ný lög um samþætta þjónustu í þágu farsældar barna hafa tekið gildi. Markmiðið er að tryggja að börn og forsjáraðilar fái rétta aðstoð, á réttum tíma, frá réttum aðilum. Fjölskyldum og börnum sem þurfa snemmtækan stuðning er tryggður aðgangur að tengilið farsældar í nærumhverfi barnsins, svo sem í leikskóla eða grunnskóla. Tengiliður farsældar veitir upplýsingar og leiðbeiningar um þjónustu og stuðlar að því að börn og forsjáraðilar hafi aðgang að þjónustu án hindrana. Til að óska eftir samþættri þjónustu geta börn, ungmenni og forsjáraðilar haft samband við tengilið farsældar.
Tengiliðir Hagaskóla eru:
Nánari upplýsingar um lögin og þjónustuna eru á heimasíðunni farsaeldbarna.is
Skólastarfsemi
Starfsáætlun
Námsáætlanir
Hér verður innan skamms hægt að nálgast námsáætlanir í kjarnagreinum fyrir haustönn 2024. Athugið að áætlanirnar eru birtar með fyrirvara um breytingar.
Foreldrasamstarf
Við erum öll í þessu saman, enda er oft sagt að það þurfi heilt þorp til að ala upp barn. Í skólum borgarinnar er markvisst unnið að því að auka samráð við foreldra og styrkja aðkomu þeirra að skólastarfi. Foreldrafélag er starfrækt í öllum skólum Reykjavíkurborgar.
Í Hagaskóla er starfandi foreldrafélag líkt og grunnskólalög segja til um. Stjórn foreldrafélagsins er jafnan kosin á aðalfundi þess í upphafi skólaársins. Stjórn foreldrafélagsins sér meðal annars um að velja fulltrúa í skólaráð. Foreldrafélagið hefur margvíslegt hlutverk til dæmis að bjóða upp á fræðslu fyrir foreldra í skólanum, undirbúa vorferð 10. bekkjar og fleira.
Skólastjóri er ábyrgur fyrir stofnun foreldrafélags og sér til þess að félagið fái aðstoð eftir þörfum. Hlutverk foreldrafélags er að styðja skólastarfið, stuðla að velferð nemenda og efla tengsl heimila og skóla.
Foreldrafélag hvers skóla setur sér starfsreglur, m.a. um kosningu í stjórn félagsins og kosningu fulltrúa í skólaráð.
Stjórn foreldrafélags Hagaskóla fundar reglulega í skólanum.
Foreldrafélagið hefur ekki skipulagða verkefnaskrá yfir skólaárið en meðal þeirra verkefna sem félagið tekur að sér er skipulag og framkvæmd foreldrarölts, skipulag og framkvæmd vorferðar 10. bekkjar og ýmis önnur verkefni.
Markmið:
- að styðja við skólastarfið
- stuðla að velferð nemenda skólans
- efla tengsl heimilis og skóla
- hvetja til virkrar þátttöku forráðamanna í skólastarfi
- hagsmunagæsla, aðhald og eftirlit með skólastarfinu
Stjórn foreldrafélagsins gerir sér verkefnaskrá fyrir hvert ár og er hún birt á heimasíðu skólans þegar hún er tilbúin. Nöfn og netföng verða færð inn eftir aðalfund foreldrafélagsins í haust.
Heimili og skóli hafa gefið út handbækur fyrir fulltrúa foreldra á öllum skólastigum. Í þeim er lýst starfi foreldrafélaga og foreldra- og skólaráða.
Stjórn foreldrafélags Hagaskóla 2022-2023 skipa:
- Vífill Harðarson, formaður
- Gróa Helga Eggertsdóttir, ritari
- Guðný Arndís Óskarsdóttir
- Heiðrún Arna Friðriksdóttir
- Rannveig Jónsdóttir
Skólaráð
Skólaráð Hagaskóla
Skólaráð sem er samráðsvettvangur skólastjóra og skólasamfélags um skólahald. Samkvæmt 8. grein laga um grunnskóla nr. 91/2008 skal starfa skólaráð við hvern grunnskóla.
Skólaráð tekur þátt í stefnumörkun fyrir skólann og mótun sérkenna hans. Ráðið skal skipað níu einstaklingum til tveggja ára í senn, tveimur fulltrúum kennara ásamt einum fulltrúa annars starfsfólks, tveimur fulltrúum nemenda og tveimur fulltrúum foreldra auk skólastjóra sem stýrir starfi skólaráðs og ber ábyrgð á stofnun þess.
Skólaráð fjallar um skólanámskrá skólans, árlega starfsáætlun, rekstraráætlun og aðrar áætlanir um skólastarfið áður en endanleg ákvörðun um þær er tekin. Í starfsáætlun eru fjórir fastir á fundir skólaráðs en að auki er ráðið kallað saman ef upp koma mál sem nauðsynlegt þykir að bera undir það og fjalla um.
Skólastjóri:
Fulltrúar nemenda:
Fulltrúar foreldra:
Fulltrúi grenndarsamfélagsins:
- Brynja Helgadóttir, forstöðumaður Frosta
Fulltrúar kennara:
Fulltrúi starfsfólks:
Skólahverfi Hagaskóla
Í Reykjavík eru mörg skólahverfi og barnið þitt hefur forgang í sinn hverfisskóla. Engu að síður eiga allir foreldrar kost á að sækja um skóla fyrir börn sín hvar sem er í borginni samkvæmt reglum um skólahverfi, umsókn og innritun. Hér finnur þú upplýsingar um hvaða götur tilheyra skólahverfi Hagaskóla.
Er barnið þitt að byrja í grunnskóla?
Á þessari síðu færðu gagnlegar upplýsingar um skólabyrjun. Eins og til dæmis hvað börnin þurfa að taka með sér í skólann og hvort börnin fái mat á skólatíma.