Að byrja í grunnskóla
Börn byrja í grunnskóla árið sem þau verða sex ára og eru þá skólaskyld. Þau fá úthlutað plássi í sínum hverfisskóla og forsjáraðili þarf að staðfesta innritun rafrænt.
Einnig er hægt að sækja um skólavist í skóla utan skólahverfis.
Innritun í grunnskóla er opin frá fyrsta miðvikudegi í mars til 1. september ár hvert.
Gagnlegar upplýsingar fyrir grunnskólabyrjun
Áður en skólinn hefst
Ef barnið þitt verður sex ára á árinu færð þú tölvupóst frá Reykjavíkurborg þar sem óskað er eftir að þú staðfestir skráningu barnsins þíns í ykkar hverfisskóla. Þú getur líka sótt um utan ykkar skólahverfis.
Hverfisskóli - hvað er það?
Hverfum borgarinnar er skipt í skólahverfi. Hvert heimilisfang í hverfinu tilheyrir ákveðnum skóla. Barnið þitt á rétt á skólavist í sínum hverfisskóla en þú getur líka sótt um í öðrum skólahverfum borgarinnar ef þú vilt en ekki er tryggt að allir grunnskólar geti tekið við börnum utan skólahverfis.
Skóladagatal
Þú getur séð skóladagatal grunnskólanna á heimasíðum þeirra.
Hvað þarf að hafa með sér?
Barnið þitt þarf að koma með skólatösku, nesti og sundföt (þegar það á við) í skólann. Gott er að hafa auka föt í skólatöskunni og vera klædd eftir veðri. Skólinn útvegar allar bækur og ritföng sem barnið þitt notar í skólanum.
Viðtöl við umsjónarkennara
Í upphafi skólaárs er skólasetning fyrir nemendur sem eru að fara í 2. – 10. bekk. Börnin sem eru að byrja í 1. bekk fara ekki á skólasetninguna heldur hitta þau umsjónarkennarann sinn í viðtali með foreldrum/forsjáraðilum á fyrstu dögum skólaársins. Dagana sem viðtölin fara fram er ekki hefðbundin dagskrá í skólanum. Eftir að viðtalsdögum lýkur mæta 1. bekkingar í skólann samkvæmt stundaskrá. Frístundaheimili eru ekki opin á viðtalsdögunum í upphafi skólaárs.
Matur á skólatíma - hvar skrái ég? hvað kostar?
Öll börn geta fengið heitan mat í hádeginu í mötuneyti skólans. Flest börn eru skráð í mataráskrift. Þegar þú staðfestir skólavist fyrir barnið þitt getur þú skráð það í mataráskrift um leið. Hægt er að skoða matseðil á heimasíðu skólans. Mataráskrift kostar það sama í öllum skólum, 12.836 kr. á mánuði.
Frímínútur
Barnið þitt fer út í frímínútur á fyrirfram ákveðnum tíma, yfirleitt tvisvar á dag. Það er því mikilvægt að koma klædd eftir veðri og að allur fatnaður sé merktur barninu. Á leiksvæðum barnanna er starfsfólk á vegum skólans sem sinnir gæslu.
Frístundaheimili - hvað er það?
Þegar skólinn er búinn á daginn getur barnið þitt farið í frístundaheimili. Þar er fjölbreytt tómstundastarf í boði sem einkennist af skipulögðum sem og frjálsum leik. Þar er boðið upp á skemmtileg viðfangsefni sem veita barninu þínu útrás fyrir leik- og sköpunarþörf. Frístundaheimilin vinna mörg í samstarfi við íþróttafélögin í hverfinu. Upplýsingar um dagskipulag og fleira færð þú sent frá frístundaheimilinu í tölvupósti.
Frístundaheimili - hvenær er opið?
Frístundaheimilin eru opin á viðtalsdögum og starfsdögum kennara, nema annað sé tekið fram en lokuð þegar það er vetrarfrí í grunnskólunum. Frístundaheimilin eru opin í jóla- og páskafríum grunnskólanna. Þá daga sem ekki er grunnskólastarf er óskað eftir sérstakri skráningu í frístundaheimilin fyrir þá daga á hverjum stað fyrir sig.
Frístundaheimili - hvernig sæki ég um? hvað kostar?
Skrá þarf börn sérstaklega í frístundaheimili og það getur þú gert þegar þú hefur staðfest skráningu fyrir barnið þitt í ykkar hverfisskóla, eða sótt um í skóla utan skólahverfis. Frístundaheimilið býður börnum pláss af biðlista þegar starfsfólk hefur verið ráðið inn eftir sumarfrí.
Vetrarfrí
Í þrjá daga í október og tvo daga í febrúar er vetrarfrí í öllum grunnskólum borgarinnar. Þá eru frístundaheimilin lokuð. Nánari upplýsingar um dagsetningar vetrarfrís má nálgast á heimasíðu grunnskólanna.
Tilbúin... viðbúin... grunnskóli!
Ready... steady... primary school!
Gotowy... przygotowany... szkola podstawowa!
