Spurt og svarað um leikskóla

Þú getur sótt um í öllum leikskólum borgarinnar rafrænt, bæði í borgarrekna leikskóla og sjálfstætt starfandi. 

• Sækja um leikskóla

Þú getur sótt um í leikskóla um leið og barnið fæðist. Hversu snemma þú sækir um hefur ekki áhrif á hversu fljótt barnið fær pláss.

Börn eru skráð á biðlista í þeim skólum sem sótt er um þegar þau verða 6 mánaða. Plássum er svo úthlutað eftir kennitöluröð. Miðað er við að þau börn sem eru orðin 18 mánaða 1. september ár hvert fái boð í leikskóla það sama haust. Plássum er úthlutað fyrir haustið í mars/apríl, umsóknir sem berast eftir þann tíma eru afgreiddar síðar.

Eftir að sótt er um færð þú sendan staðfestingarpóst um að umsókn sé móttekin. Þegar pláss býðst færð þú annan póst með boði um vistun. Í millitíðinni eru ekki sendar tilkynningar um stöðu mála en þú getur skoðað hana inni á Völu. Tekið er inn í leikskóla allan ársins hring, en flestum plássum er úthlutað á vorin.

Innritað er í leikskóla allt árið eftir því sem pláss losna í leikskólum. Flestum plássum er úthlutað á tímabilinu mars-maí. Þá er yfirleitt orðið nokkuð ljóst hversu mörg pláss losna um haustið vegna flutninga á milli leikskóla og útskrifta elstu barna sem eru að byrja í grunnskóla. Þegar plássi er úthlutað færðu tölvupóst þar sem þú getur samþykkt eða hafnað plássinu.

Innritun í leikskóla

Reynt er að miða við það að börn sem eru orðin 18 mánaða 1. september ár hvert fái boð um leikskóladvöl það sama haust. Börn með samþykktan forgang mega byrja í leikskóla við 12 mánaða aldur. 

Í sumum sjálfstætt starfandi leikskólum geta börn byrjað fyrr. Upplýsingar um það er að finna á heimasíðum þeirra.

Leikskólagjöld eru greidd samkvæmt gjaldskrá og skiptast í námsgjald og fæðisgjald. 

Ekki er greitt námsgjald fyrir vistun sem 36 tímar á viku eða skemur þá er einungis greitt fæðisgjald.

Greitt er námsgjald fyrir hvern hálftíma yfir 36 tíma vistun auk fæðisgjalds.

• Fyrir hvern hálftíma eftir 36 tíma og að 38 tímum er námsgjaldið 1.750 kr.
• Fyrir hvern hálftíma milli 38 og 40 tíma er námsgjaldið 2.750kr.
• Fyrir hvern hálftíma eftir 40 tíma á viku er námsgjaldið 4.000kr.

Gjöldin eru innheimt fyrirfram með kröfu í netbanka. Gjalddagi leikskólagjalda er 1. hvers mánaðar og eindagi 30 dögum síðar.

Þú getur séð hvernig leikskólagjöldin eru fyrir þig í reiknivélinni.

Upplýsingar um gjaldskrá sjálfstætt starfandi leikskóla má finna á heimasíðum þeirra.

• Meira um gjöld og niðurgreiðslur 

Já, þú gætir átt rétt á afslætti fyrir barnið þitt. Hægt er að sækja um afslátt sem tekur mið af tekjum forsjáraðila og miðast við heildartekjur á ári samkvæmt skattframtali.

Fyrir einstæða foreldra

• Árstekjur undir 8 m.kr. → 75% afsláttur af námsgjaldi
• Árstekjur á bilinu 8–13 m.kr. → 50% afsláttur af námsgjaldi.
• Árstekjur yfir 13 milljónir → 40%

Fyrir hjón eða sambúðarfólk

• Árstekjur undir 11 m.kr. → 40% afsláttur af námsgjaldi
• Árstekjur á bilinu 11–18 m.kr. → 20% afsláttur af námsgjaldi

Aðrir afslættir

• Starfsfólk leikskóla fær 50% afslátt af námsgjaldi ef það er í 50% starfi eða meira.
• Systkinaafsláttur reiknast sjálfkrafa fyrir börn sem eiga sama lögheimili. Þessi afsláttur gildir þvert á þjónustu leikskóla, grunnskóla og frístundaheimila. Systkinaafsláttur af dvalargjaldi er 100% fyrir hvert barn umfram eitt. Systkinaafsláttur af fæði er 100% hjá börnum umfram tvö.
• Hægt er að sækja um afslátt ef barnið þitt getur ekki mætt í leikskólann vegna langvarandi veikinda

Umsókn um afslátt af leikskólagjaldi fer fram í gegnum Völu þegar barn er byrjað í leikskóla. Athugið að til að geta sótt um þarf umsækjandi að vera með sama lögheimili og barnið. Afslátturinn á einnig við um sjálfstætt starfandi leikskóla og dagforeldra.

• Sjá meira um afslátt af leikskólagjaldi

Í leikskólum borgarinnar fá börnin daglega morgunverð, hádegisverð og hressingu. Áhersla er lögð á hollan mat sem uppfyllir hollustuviðmið Landlæknisembættisins.

• Börn sem eru orðin 5 ára þegar sótt er um.
• Fötluð börn og börn með skilgreind þroskafrávik. Vottorð frá viðurkenndum greiningaraðila þarf að fylgja umsókn.
• Börn foreldra undir lögaldri (18 ára).
• Börn einstæðra foreldra með þrjú eða fleiri börn á framfæri þar sem elsta barnið er ekki eldra en 9 ára.
• Þríburar.
• Börn starfsfólks í leikskólum Reykjavíkurborgar. Staðfesting frá leikskólastjóra þarf að fylgja.
• Börn sem búa við alvarlegar aðstæður. Undir það falla:
  
  a) Barnaverndarmál. Vottorð frá félagsmálayfirvöldum þarf fylgja umsókn.
  
  b) Alvarleg veikindi, alvarleg fötlun eða alvarlegir félagslegir erfiðleikar hjá fjölskyldumeðlimum barnsins. Vottorð frá lækni eða öðrum opinberum aðilum þarf að fylgja umsókn.

Ef flutningar til Reykjavíkur eru á dagskránni er hægt að sækja um leikskólapláss í leikskólum borgarinnar. Barnið getur svo hafið leikskólagöngu þegar því hefur verið úthlutað plássi og lögheimili þess hefur verið flutt til Reykjavíkur.

Hægt er að sjá lista yfir alla leikskóla í borginni og flokka þá eftir hverfum. Þannig sérðu hvaða leikskólar eru í þínu hverfi. 

• Sjá lista með leikskólunum

Nei, það er hægt að sækja um leikskóla í hvaða hverfi sem er.

Þegar barn hefur hafið vistun þá er hægt að sækja um flutning í annan leikskóla í gegnum Völu. Hafðu í huga að til að eiga möguleika á að skipta um leikskóla um haustið þarf að sækja um flutning fyrir lok febrúar.

• Sækja um flutning á milli leikskóla

Um leið og barn byrjar í sjálfstætt starfandi leikskóla dettur það af biðlista hjá borginni. Ef þú vilt halda áfram að vera á biðlista hjá borginni þarft þú að sækja um flutning.

Það sama á við ef barn byrjar í borgarreknum leikskóla, þá dettur það út af biðlista hjá sjálfstætt starfandi leikskóla.

• Sækja um flutning á milli leikskóla

Þú getur séð lista yfir leikskóla með ungbarnadeildir á vef Reykjavíkurborgar.

• Sjá lista yfir ungbarnadeildir

Allir borgarreknir leikskólar eru opnir frá 7:30–16:30.  Vistun barna getur hafist á tímabilinu 7:30-9:00

Hægt er að sjá opnunartíma sjálfstætt starfandi leikskóla á heimasíðum þeirra.

Áður en leikskóladvöl barns hefst gera viðkomandi leikskóli og foreldrar/forsjáraðilar með sér dvalarsamning. Með undirritun sinni staðfesta foreldrar/forsjáraðilar að þeir hafi kynnt sér gjaldskrá skóla- og frístundasviðs og reglur um leikskólaþjónustu og skuldbinda sig til þess að fylgja þeim eins og þær eru á hverjum tíma.

Börn sem dvelja í leikskólum borgarinnar taka að lágmarki tuttugu virka daga í sumarleyfi. Gjöld falla niður þann tíma. 

Leikskólar eru lokaðir sex daga á ári vegna skipulagsdaga. Þrír þeirra skulu vera á sama tíma og starfsdagar starfsfólks eða frídagar nemenda í grunnskólum en hinir þrír geta verið ýmist hálfir dagar eða heilir. Leikskólagjöld lækka ekki vegna þessa.

 Ef þú vilt nýta þér þessa daga þarf að skrá viðveru innan skráningarfrests. Skráning fer fram í Völu. Skáning fer fram 10.-20. september fyrir haustönnina og 10.-20. janúar fyrir vorönnina.

Lokað er í leikskólum einn dag í vetrarfríi í febrúar. Leikskólagjöld lækka ekki vegna þessa.

Á skráningardögum er vistun valkvæð og leikskólagjöld felld niður fyrir þá daga sem barnið er í fríi. Ef óskað er eftir vistun fyrir barn á þessum dögum þarf að skrá það sérstaklega og greiða fyrir þá daga. Gjald fyrir skráninardaga er 5.000kr. pr/dag. Systkinaafsláttur er 50% fyrir yngra barn og 100% fyrir þriðja barn.

Almenna reglan er sú að skráningardagar fylgi frídögum grunnskóla borgarinnar í kringum páska, vetrarfrí og jól. 

Fyrstu dagar barns í leikskóla kallast aðlögun. Það er mismunandi eftir leikskólum hvernig henni er háttað, en foreldrar gegna alla jafna lykilhlutverki í aðlögun barnsins.

Í aðlögun gefst barni, foreldrum og starfsfólki tími til þess að kynnast. Frá fyrsta degi er lögð áhersla á að byggja upp góð tengsl á milli leikskólans og fjölskyldu barnsins. Foreldrar fá frekari upplýsingar um aðlögun þegar barni hefur verið boðið pláss á leikskóla.

• Meira um aðlögun í leikskóla

Hver leikskóli er sérstakur. Sumir leggja áherslu á samskipti, lestur eða ritmál, aðrir á stærðfræði, náttúru og umhverfismál. Leikskólarnir eru misstórir og fjöldi barna og deilda á leikskólum ólíkur. Hægt er að kynna sér starfsemi leikskóla borgarinnar á vefnum áður en sótt er um.

• Skoða alla leikskóla

Börn geta fengið sérstakan stuðning eða sérkennslu í leikskólum eftir mat frá sérfræðingi eða greiningaraðila. Meginmarkmið sérkennslu er að tryggja jöfn réttindi barna í leikskólastarfinu, óháð líkamlegri og andlegri getu.

• Meira um stuðning í leikskóla