Kannanir, mat og eftirlit

Kannanir, mat og eftirlit er reglulega unnið í leikskólum, grunnskólum og í frístundastarfi Reykjavíkurborgar. Það er órjúfanlegur hluti af starfsemi þeirra og áhersla er lögð á að gögnin séu nýtt í innra mati starfsstaðanna.  

Kannanir á högum og líðan barna

Hér má sjá niðurstöður kannana, mat á tilraunaverkefnum, upplýsingar um dagforeldraeftirlit og árlegt eftirlit í sjálfstætt starfandi leik- og grunnskólum. 

Skólapúlsinn

Skólapúlsinn gerir árlega nemendakannanir í 1.-5. bekk og 6.-10. bekk. Spurningarnar snúa að þáttum eins og líðan barna í skólanum, virkni í námi og um skóla- og bekkjaranda. Nær allir grunnskólar í Reykjavík taka þátt í mælingum Skólapúlsins en lögð er áhersla á að niðurstöðurnar séu kynntar fyrir hagsmunaaðilum og að niðurstöðurnar séu nýttar til umbóta.

Rannsóknir og greining

Rannsóknir og greining hefur gert nemendakannanir í 5.-7. bekk og 8.-10. bekk. Spurningarnar hafa snúist um þætti í lífi barna og unglinga eins og andlegri og líkamlegri heilsu, tengslum nemenda við jafnaldra, notkun þeirra á netmiðlum, lestri bóka og viðhorfi þeirra til jafnréttis. Megináhersla hefur verið á að greina áhættuhegðun og verndandi þætti eins og virkni og tengsl. Lögð er áhersla á að starfsfólk skóla, félagsmiðstöðva og verkefnisstjórar forvarna vinni með niðurstöðurnar nemendakannana og þær séu kynntar og ræddar með nemenda og foreldrahópnum, sé þess þörf. 

Íslenska æskulýðsrannsóknin

Íslenska æskulýðsrannsóknin (ÍÆ) er rannsókn sem Háskóli Íslands framkvæmir fyrir mennta- og barnamálaráðuneytið á grundvelli 12. gr. æskulýðslaga nr. 70/2007. Markmið rannsóknarinnar er að safna gögnum um velferð og viðhorf barna en könnun Íslensku æskulýðsrannsóknarinnar hófst skólaárið 2021-2022. Rannsóknin er lögð fyrir vor hvert í grunnskólum í 4., 6., 8. og 10. bekk. Niðurstöðurnar sýna stöðu þátta er varða líðan, heilsuhegðun og viðhorf grunnskólanemenda. Skólar og sveitarfélög fá niðurstöðurnar og er markmiðið að þær geti stutt við stefnumótun hvers skóla og sveitarfélaga í heild.

Matsferill

Matsferill er stöðu- og framvindupróf sem  Miðstöð menntunar og skólaþjónustu  heldur utan um. Matferill skiptist í: Lesfimi – Lesskilning - Stærðfræði 
Matsferill veitir nemendum, foreldrum og kennurum skýrar upplýsingar um stöðu og framfarir nemanda. Skólar, sveitarfélög og menntayfirvöld fá einnig skýra mynd af stöðunni í stærra samhengi, sem gerir skólastjórnendum og stefnumótandi aðilum kleift að greina áskoranir og leggja til umbætur.

Lesferill er matstæki sem metur grunnþætti læsis, s.s. lesfimi, lesskilning, ritun, orðaforða og málskilning. Mælt er með því að lesferill sé lagður fyrir alla nemendur reglulega í 1.-10. bekk en núna er hann valfrjáls möguleiki. Þegar fram líða stundir verður lesferill hluti af matsferlinum.

Lesmál er matstæki sem metur lestur, lesskilning og réttritun nemenda í 2. bekk. Prófið skiptist í átta undirþætti sem mynda eftirfarandi fjóra yfirþætti: umskráningu, lesskilning, hraðlestur og réttritun. Reykjavíkurborg birtir skýrslu fyrir borgina í heild en auk þess fær hver skóli sína skýrslu.

Milli mála - málþroskakönnun

Milli mála er staðlað málkönnunarpróf sem er lagt fyrir alla nemendur með fjölbreyttan tungumálabakgrunn í grunnskólum Reykjavíkur. Prófið er almennt lagt fyrir nemendur í 1., 4. og 7. bekk og 9. bekk ef þarf. Niðurstöður prófsins gefa vísbendingar um hversu mikið barnið skilur af því sem fram fer í kennslustundum og hver stuðningsþörf barnsins er. Niðurstöður prófsins á að nýta við skipulag kennslu.

Málþroskaskimanir í leikskóla

Misjafnt er hvaða málþroskaskimanir leikskólar nota, það er val leikskóla.

EFI-2 er málþroskaskimun á málskilningi og máltjáningu barna sem eru á 4. ári, ætluð þeim sem koma að sérkennslu barna í leikskólum. EFI-2 málþroskaskimun gefur markvissar niðurstöður til að meta hvort þörf sé á frekari greiningu fagaðila.

Hljóm-2 er aldursbundin skimun sem er lögð fyrir til að meta hljóðkerfis- og málvitund barna í elsta árgangi leikskólans. Skimunin er framkvæmd í því skyni að greina þau börn sem eru í áhættu vegna lestrarerfiðleika þegar formlegt lestrarnám hefst.

Orðaskil er ætlað að mæla orðaforða barna og vald þeirra á beygingarkerfi og setningargerð frá 18 mánaða til 3 ára. Það er oftast notað ef grunur leikur á að um seinkaðan málþroska sé að ræða. Foreldrar fylla út listann.

TRAS er skráningartæki, notað til þess að skrá og fylgjast með málþroska 2-5 ára barna. Hvert og eitt barn á sitt skjal og fyllt er út í reitina tvisvar sinnum á ári frá tveggja ára aldri út leikskólagönguna.

LANIS-málþroskaskimun er skimunarlisti, ætlaður fyrir börnum á aldrinum 2 ára og 11 mánaða til 3 ára og 9 mánaða. Markmið LANIS er að skima fyrir málþroska- og framburðarfrávikum barna svo að hægt sé að bera tímanlega kennsl á börn sem eiga í erfiðleikum með að tjá sig til þess að unnt sé að veita þeim þann skilning og stuðning sem þau þarfnast. LANIS-listinn er tvíþættur, ætlaður foreldrum og leikskólastarfsfólki.

Foreldrakannanir

Foreldrakannanir skóla- og frístundasviðs eru gerðar meðal foreldra barna í leikskólum, grunnskólum og frístundastarfi Reykjavíkurborgar annað hvert ár. Lögð er áhersla á að niðurstöður séu rýndar, þær kynntar hagsmunaaðilum og unnið sé með þætti sem þarfnast umbóta í kjölfarið.

Stofnun ársins - Starfsmannakönnun Reykjavíkurborgar

Starfsmannakönnun Reykjavíkurborgar, Stofnun ársins, er gerð meðal allra starfsmanna borgarinnar á hverju ári. Tilgangur könnunarinnar er að styrkja starfsumhverfi í opinberri þjónustu og til að veita ítarlegar upplýsingar um stöðu mála, þ.e. styrkleika og áskoranir í starfsumhverfinu. Lögð er áhersla á að niðurstöður séu kynntar starfsfólki, samræður eigi sér stað um niðurstöðurnar og unnið sé með þætti sem þarfnast umbóta.

Fagumhverfiskönnun skóla- og frístundasviðs

Fagumhverfiskönnun skóla- og frístundasviðs Reykjavíkurborgar er send á allt starfsfólk í leikskólum, grunnskólum, frístundaheimilum, félagsmiðstöðvum og skólahljómsveitum. Markmið könnunarinnar er að fá fram viðhorf starfsfólk um hvernig faglegt starfsumhverfi, hlutverk og starfsþróun nýtast starfsfólki í dag og í kjölfarið styðja betur við starfsstaði. Niðurstöður nýtast einnig til að fylgjast með innleiðingu menntastefnu og tryggja að stuðningur og úrræði taki mið af raunverulegum þörfum starfsfólks.

Starfsstaði með svör frá 7 aðilum eða fleirum fá sendar niðurstöður fyrir sinn starfsstað, fagskrifstofur og miðstöðvar fá sendar niðurstöður fyrir fagsviðið og borgarhlutann auk þess sem niðurstöður fyrir Reykjavík í heild eru birtar.

Mat á tilraunaverkefnum

Fyrr á frístundaheimili 2023 og 2024

Eftirlit í sjálfstætt starfandi leikskólum

Samkvæmt reglugerð um mat og eftirlit í leikskólum (nr. 893/2009) er Reykjavíkurborg skylt að fylgjast með leikskólastarfi allra leikskóla sem reknir eru í borginni. Farið er yfir gögn leikskólans árlega og stjórnendur leikskólanna svara könnun um fjölda barna og starfsfólk, innritun og opnunartíma, öryggismál, foreldrasamvinnu og uppeldis- og menntastarf, sem eftirlitsaðilar yfirfara. Ef athugasemdir eru gerðar við eftirlitið er málum vísað til fagskrifstofu leikskólamála og/eða fagskrifstofu fjármála á skóla- og frístundasviði, sem vinnur áfram með viðkomandi leikskóla að úrlausn mála.

Eftirlit í sjálfstætt starfandi grunnskólum

Samkvæmt reglugerð (658/2009) er Reykjavíkurborg skylt að fylgjast með grunnskólum sem reknir eru í borginni. Farið er yfir gögn grunnskólans árlega, m.a. starfsáætlun og skólanámskrá, upplýsingar um fjölda barna og starfsfólk, húsnæði og fjármál. Eftirlit SFS gagnvart sjálfstætt reknum grunnskólum í borginni getur einnig falist í því að bregðast við ábendingum á sama hátt og gagnvart öðrum grunnskólum í borginni. Ef athugasemdir eru gerðar er fagskrifstofu grunnskólamála og/eða fagskrifstofu fjármála á skóla- og frístundasviði falið að vinna með viðkomandi grunnskóla að úrlausn mála.

Dagforeldraeftirlit

Dagforeldrar starfa sjálfstætt en Reykjavíkurborg sinnir eftirliti með daggæslu og fer í þrjár óboðaðar eftirlitsheimsóknir árlega á hvern starfsstað. Upplýsingar um gæði og eftirlit dagforeldra.