Hitt húsið

Um Hitt húsið

Hitt Húsið er miðstöð ungs fólks á aldrinum 16-25 ára á sviði menningar og lista, tómstunda, upplýsinga og ráðgjafar, atvinnumála og forvarna. Í Hinu Húsinu getur ungt fólk nýtt sér aðstöðuna til að syngja, dansa, dreyma, skapa, læra, spila, funda og fleira. Ýmis félög og samtök ungs fólks hafa aðstöðu í Hinu Húsinu. 

Í Hinu húsinu er starfrækt frítímastarf fyrir ungmenni með fötlun.

• Facebook síða Hins hússins
• Instagram síða Hins hússins

Markmið

• Veita ungu fólki aðstöðu og aðstoð við að koma hugmyndum sínum í framkvæmd 
• Endurspegla menningu ungs fólks 
• Veita upplýsingar og ráðgjöf  
• Styrkja stöðu ungs fólks á vinnumarkaði 
• Vera vettvangur fyrir félagsleg úrræði

Saga

Hitt Húsið var stofnað af Íþrótta- og tómstundaráði Reykjavíkurborgar 15. október 1991 fyrir ungt fólk á aldrinum 16- 25 ára. 

Í fyrstu var Hitt Húsið staðsett í gamla skemmtistaðnum Þórskaffi í Brautarholti. Þar hófst fjölbreytt starfsemi fyrir ungt fólk á sviði menningar, atvinnumála og skemmtunar. Strax á fyrsta starfsárinu hófst Unglist – listahátíð ungs fólks sem og opin hús fyrir fötluð ungmenni. Í húsnæðinu var ennfremur æfingaaðstaða fyrir hljómsveitir og þar voru haldin böll á vegum framhaldsskólanna.  

Í ágúst 1995 var starfsemin flutt í gamla Geysishúsið við Aðalstræti. Frá þeim tíma hefur Hitt Húsið þróast enn frekar í menningar- og upplýsingamiðstöð ungs fólks auk þess að starfrækja ýmis úrræði á sviði ráðgjafar, fræðslu og atvinnumála sem og frístundastarf fatlaðra ungmenna. Í mars 2002 var Hitt Húsið svo enn fært um set, í þetta sinn að Pósthússtræti 3- 5.     

Haustið 2015 flutti hluti frístundastarfs fatlaðra upp á Rafstöðvarveg 9, en í janúar 2019 flutti starfsemi Hins Hússins alfarið upp á Rafstöðvarveg 7-9.