Innra og ytra mat

Mat á gæðum skóla- og frístundastarfs byggist annars vegar á innra mati og hins vegar á ytra mati. Matið er annaðhvort unnið af stjórnendum og starfsfólki starfsstaðar (innra mat) eða af utanaðkomandi aðilum (ytra mat).

Innra mat

Hjá skóla- og frístundasviði Reykjavíkurborgar er áhersla lögð á að efla innra mat starfsstaða með stuðningi, ráðgjöf og eftirfylgni. Sú áhersla byggir á þeirri reynslu að innra mat skapar sterkan grunn fyrir faglega þróun, eykur eignarhald starfsfólks á umbótum og stuðlar að því að niðurstöður mats nýtist til raunverulegra breytinga í starfi. Því er öflugt innra mat lykilþáttur í að tryggja gæði, fagmennsku og stöðuga þróun í skóla- og frístundastarfi Reykjavíkurborgar.

Áhersla er lögð á að allir starfsstaðir skóla- og frístundasviðs Reykjavíkurborgar vinni markvisst innra mat. Í því felst fagleg ígrundun þar sem mat er lagt á hversu vel tekst að ná þeim gæðum og þeim árangri sem stefnt er að út frá fyrir fram ákveðnum viðmiðum sem meðal annars byggja á lögum, reglugerðum og aðalnámskrám skóla auk þeirra áherslna sem starfsstaðir setja sér.

Ytra mat

Ytra mat er framkvæmt af utanaðkomandi aðilum og hefur m.a. það hlutverk að meta starfsemi út frá fyrir fram skilgreindum gæðaviðmiðum sem byggja m.a. á lögum og reglugerðum um skóla- og frístundastarf, auk aðalnámskráa.

Ytra mat er einnig þegar skrifstofa skóla- og frístundasviðs fylgist með stöðu og þróun starfsstaða með reglubundinni upplýsingaöflun, greiningum, könnunum, úttektum og annarri eftirfylgni. Slík gögn veita mikilvæga yfirsýn yfir árangur, áskoranir og þróun í starfseminni og veita upplýsingar um hvaða stuðning eða viðbrögð þarf fyrir starfsfólk og starfsstaði.

Leikskóli: Ytra mat

Hér eru birtar skýrslur ytra mats í leikskólum árin 2014-2023  auk umbótaáætlana og gagna sem tilheyra hverju mati. Ytra mat var framkvæmt af skrifstofu skóla- og frístundasviðs Reykjavíkurborgar og Menntamálastofnun.

Grunnskóli: Ytra mat

Hér eru birtar skýrslur  ytra mats í grunnskólum frá árunum 2007-2019 sem skrifstofa skóla- og frístundasviðs Reykjavíkurborgar gerði, ásamt umbótaáætlunum og öðrum gögnum sem tengjast matinu.

Frístundastarf: Ytra mat

Hér eru birtar skýrslur ytra mats á frístundaheimilum og félagsmiðstöðvum frá árunum 2014-2020 ásamt umbótaáætlunum og öðrum gögnum sem tengjast matinu.