Fékkstu miða á tunnuna þína?

Teikning af starfsmanni sorphirðu með gráa tunnu við sorphirðubíl.

Ef ekki er hægt að losa tunnuna þína af einhverjum ástæðum er skilinn eftir límmiði á tunnunni með skýringu á því hvers vegna ekki var hægt að losa. 

Í flestum tilvikum er aðgengi að tunnunni ekki nógu gott eða vandamál með flokkun, innihald eða tunnuna sjálfa.

Brýnt er að bregðast við ábendingum sem fyrst svo hægt sé að losa tunnuna í næstu tæmingu.

Sorphirðudagatal Hvert fer ég með umframsorpið?

Hvað þarf ég að gera ef ég fæ miða á tunnuna mína?

Á miðanum sem þú fannst á tunnunni er hakað við skýringu á því af hverju tunnan var ekki tæmd. Í flestum tilfellum er einfalt að gera úrbætur: færa bílinn úr innkeyrslunni á losunardögum, muna að moka á snjóþungum dögum eða skipta um peru í útiljósum.  

Neðar á síðunni finnur þú ýmsan fróðleik um flokkun og aðgengi til að hjálpa þér að gera nauðsynlegar úrbætur.

Hvernig losna ég við sorpið sem var ekki losað?

Þegar úrbætur hafa verið gerðar eru eftirfarandi leiðir í boði: 

  • Ef losun er ekki aðkallandi getur þú skoðað hvenær næsta tæming fer fram í sorphirðudagatalinu. 
  • Ef losun getur ekki beðið getur þú pantað aukalosun gegn gjaldi. Tekið er grunngjald fyrir hverja aukalosun og gjald fyrir hverja tunnu sem losuð er.
  • Þú getur farið með sorp á grenndarstöðvar og endurvinnslustöðvar Sorpu. Hafðu í huga að grenndarstöðvar taka hvorki við matarleifum né blönduðum úrgangi. 
  • Þú getur nálgast merkta poka fyrir umfram blandaðan úrgang gegn gjaldi á næstu N1 stöð eða í þjónustuveri Reykjavíkurborgar. Pokarnir eru skildir eftir hjá tunnunum og verða fjarlægðir við næstu losun.
  • Sorphirðudagatalið
  • Gjaldskrá Sorphirðu
  • Staðsetning grenndarstöðva

 

Tunnurnar okkar

Við öll heimili í Reykjavík er skylda samkvæmt lögum að flokka heimilisúrgang í fjóra flokka.

Af þeim sökum þurfa öll heimili að vera með bláa tunnu fyrir pappír, græna tunnu fyrir plast, brúna tunnu fyrir matarleifar og gráa tunnu fyrir blandaðan úrgang.

Íbúar bera ábyrgð á flokkun, aðgengi og umgengni við sorptunnur.

Meira um flokkun á vef Sorpu Upplýsingabæklingur um flokkun Svona flokkum við (plakat)
Teiknaðar táknmyndir fyrir fjóra flokka sorphirðu.

Blá tunna fyrir pappír og pappa

Pappír og pappi fer laus í tunnurnar en ekki í plastpoka. Hreinsa þarf matarleifar af pappaumbúðum áður en þær eru settar í tunnuna. 

Í bláu tunnuna fara meðal annars:

  • Dagblöð
  • Bréfpokar
  • Pítsakassar
  • Pappírsumbúðir

 

Teikning af blárri tunnu og dæmi um sorp sem má fara í hana.

Græn tunna fyrir plast

Plastið má setja laust í tunnurnar. Mikilvægt er að hreinsa allar matar- og efnaleifar af plastinu og minnka rúmmál eins og mögulegt er áður en það er sett í tunnuna.

Í grænu tunnuna fara meðal annars:

  • Plastpokar
  • Plastbakkar
  • Plastílát og brúsar af ýmsu tagi
  • Frauðplast og minni hlutir úr plasti
Teikning af grænni tunnu og dæmi um sorp sem má fara í hana.

Brún tunna fyrir matarleifar

Matarleifar og annar lífrænn eldhúsúrgangur fara í tunnuna í bréfpokum en ekki í plastpokum, maíspokum eða lífplastpokum. Einnig má vefja dagblaði utan um úrganginn og setja í tunnuna.

Í brúnu tunnuna fara meðal annars:

  • Matarleifar (þar með talin bein)
  • Kaffikorgur og tepokar úr pappír (pappírsfilter má fara með)
  • Eldhúspappír og ólitaðar servíettur
  • Afskorin blóm og plöntur
Teikning af brúnni tunnu og dæmi um sorp sem má fara í hana.

Grá tunna fyrir blandaðan úrgang

Allt sem á ekki heima í brúnu, grænu eða bláu tunnunni og þarf ekki að skila á grenndar- og endurvinnslustöðvar má fara í gráu tunnuna. Ef vel er flokkað ætti lítið að falla til af blönduðum úrgangi.

Í gráu tunnuna fara meðal annars:

  • Ryksugupokar
  • Einnota bleyjur
  • Einnota dömubindi
  • Blautklútar
Teikning af grlárri tunnu og dæmi um sorp sem má fara í hana.

Nokkur atriði sem gott er að hafa í huga um aðgengi

Tröppur

Það er sérlega erfitt að koma þungum tunnum upp tröppur. Skábrautir/sliskjur eru nauðsynlegar til að bæta aðgengið í tröppum. Einnig má kanna hvort önnur staðsetning sé möguleg.

Birta

Í skammdeginu skiptir góð lýsing á vinnusvæði starfsfólks við sorphirðu miklu máli.

Hindranir

Gætið þess að reiðhjól eða annað slíkt sé ekki í gangveginum að tunnunum.

Snjór og hálka

Gætið þess að moka snjó úr gangvegi starfsfólks á losunardögum og sanda eða salta í hálku.

Hundar

Á losunardögum er betra að halda hundum fjarri. Ef hundur er tjóðraður á lóð er mikilvægt að hann verði ekki á vegi starfsfólks við sorphirðu.

Hurðir

Betra er ef dyr haldast opnar meðan starfsfólkið athafnar sig. Hurðapumpur og krókar sem halda hurðum opnum meðan losun fer fram gera vinnuna auðveldari.

Staðsetning

Athugið að samkvæmt samþykkt um meðhöndlun úrgangs í Reykjavík eiga allar tunnur hvers húss að vera geymdar á sama stað.

Undirlag

Það er mun auðveldara að draga tunnurnar eftir malbiki eða hellum en grasi og möl.

Lofthæð

Of lítil lofthæð í aðkomuleiðum gerir starfsfólki erfitt fyrir og eykur álag.

Læstar geymslur

Ef íbúar vilja læsa sorpgeymslum eða -gerðum skal notast við lyklakerfi sveitarfélagsins.

 

Nánari upplýsingar fást hjá sorphirðunni.

Læstar tunnur

Sorphirða Reykjavíkur býður ekki upp á læstar tunnur. Hreinlegasta og öruggasta lausnin er að hafa tunnur í læstu tunnuskýli eða gerði. Tunnur eru eign Reykjavíkurborgar og ekki er heimilt að breyta þeim eða festa á þær aukabúnað.

 

Ef íbúar setja lása eða annan búnað á tunnur er það alfarið á þeirra ábyrgð. Sorphirða Reykjavíkur ber ekki ábyrgð á því ef slíkur búnaður skemmist, glatast við losun eða þegar tunnum er skipt út.

Hafðu samband

Ábendingar er varða þjónustu Sorphirðu Reykjavíkur má senda í gegnum ábendingavef Reykjavíkurborgar

 

Sími þjónustuvers Reykjavíkurborgar er 411 1111

Netfang: upplysingar@reykjavik.is