Fjárhagsaðstoð
Ýmsar aðstæður geta orðið þess valdandi að fólk þarf á fjárhagslegri aðstoð að halda. Fjárhagsaðstoð er fyrir einstaklinga og fjölskyldur sem ekki geta séð sér og sínum farborða án aðstoðar, með það að markmiði að styðja fólk til sjálfshjálpar og stuðla að því að geti framfleytt sér.
Hvenær get ég sótt um fjárhagsaðstoð?
Þú getur sótt um fjárhagsaðstoð hvenær sem er mánaðarins en endilega sæktu um í byrjun mánaðar.
Hvernig sæki ég um fjárhagsaðstoð?
Þú sendir inn rafræna umsókn í gegnum Mínar síður. Þú getur sótt um hvenær sem er mánaðarins. Sótt er um aðstoð fyrir einn mánuð í einu. Umsóknin er ekki gild fyrr en þú velur að senda hana inn.
Ef þú ert ekki með rafræn skilríki til að sækja um á vefnum getur þú leitað til miðstöðvar í þínu hverfi eftir aðstoð.
Hvað gerist næst?
Ef þú ert að sækja um fjárhagsaðstoð í fyrsta sinn, eða sex mánuðir eru liðnir frá því að þú sóttir síðast um fjárhagsaðstoð, þá þarft þú að mæta á miðstöð innan tveggja virkra daga frá því að umsókn var lögð fram til að sanna á þér deili með því að sýna skilríki með mynd.
Eftir að umsókn um fjárhagsaðstoð berst er athugað hvort þú uppfyllir skilyrði reglna um fjárhagsaðstoð. Umsókn er samþykkt eða synjað.
Ef umsókn er samþykkt færð þú greidda fjárhagsaðstoð um næstu mánaðarmót.
Ef umsókn er synjað og þú telur sérstakar málefnalegar ástæður liggja fyrir því að veita skuli þér undanþágu frá reglum getur þú sent inn beiðni um áfrýjun til áfrýjunarnefndar velferðarráðs.
Hver er upphæð fjárhagsaðstoðar?
Fjárhagsaðstoð til einstaklinga getur verið allt að 239.895 kr. á mánuði. Fjárhagsaðstoð til hjóna eða fólks í sambúð getur verið allt að 383.832 kr. á mánuði.
Á ég rétt á fjárhagsaðstoð?
Þú getur átt rétt á fjárhagsaðstoð ef þú hefur náð 18 ára aldri, átt lögheimili í Reykjavík og uppfyllir skilyrði um tekjur og eignir. Aðstoðin getur verið í formi láns eða styrks. Heimilt er að veita einstaklingum og fjölskyldum aðstoð vegna sérstakra aðstæðna, meðal annars vegna heimilisaðstoðar, náms eða óvæntra áfalla.
Hvað er í boði fyrir fólk sem fær greidda fjárhagsaðstoð?
- Ábyrgðaryfirlýsing Ábyrgð á greiðslu tryggingar vegna leigu húsnæðis
- Styrkur til nauðsynlegra tannlækninga Fyrir fólk sem hefur fengið greidda fjárhagsaðstoð í a.m.k. 12 mánuði
- Útfararstyrkur Styrkur til greiðslu kostnaðar vegna útfarar
- Félagsleg ráðgjöf Markviss ráðgjöf til einstaklinga og fjölskyldna
- Greiðslur vegna barna Fyrir foreldra sem fá greidda fjárhagsaðstoð og eru með börn á framfæri