Fræðsla í Vinnuskólanum
Vinnuskóli Reykjavíkur leggur ríka áherslu á að veita nemendum góða upplifun og fræðslu í fyrstu skrefum þeirra á vinnumarkaði. Vinnuskólinn veitir meðal annars fræðslu um launaseðla, ferilskrár, vinnusiðferði og tekjuskatt. Fræðslan tekur mið af aldri nemenda.
Jafningjafræðsla Hins hússins
Vinnuskólinn er í samstarfi við Jafningjafræðsluna sem rekin er af Hinu húsinu í Reykjavík. Fræðarar Jafningjafræðslunnar koma inn í alla 9. og 10. bekkjar hópa með fjölbreytta forvarnafræðslu.
Fræðslan snýr að margvíslegum málefnum í gegnum umræður og hópeflisleiki þar sem meðal annars er leitast við að efla sjálfsmynd unglinganna.
Grænfánastarf
Mikil áhersla er lögð á umhverfismál í Vinnuskólanum. Vinnuskólinn er þátttakandi í alþjóðlega verkefninu Skólar á grænni grein sem Landvernd heldur utan um hér á Íslandi. Verkefninu er ætlað að auka umhverfismennt og styrkja umhverfisstefnu í skólanum. Leiðbeinendur Vinnuskólans kynna umhverfismál fyrir nemendum með fjölbreyttum hætti.
Vinnuskólinn hefur flaggað Grænfánanum frá 2008 en hann er viðurkenning fyrir góðan árangur í starfinu.