Vetrarhátíð - Um hátíðina
Um hátíðina
Vetrarhátíð verður haldin dagana 6.– 9. febrúar 2025 og fer hátíðin fram í öllum sex sveitarfélögum höfuðborgarsvæðisins. Þessi hátíð ljóss og myrkurs samstendur af þrem meginstoðum: Safnanótt, Sundlauganótt og ljósalist ásamt yfir 150 viðburðum þar sem fjöldi listamanna tekur þátt í að skapa einstaka stemningu í borginni.
Frítt er inn á alla viðburði á Vetrarhátíð.
Safnanótt
Á Safnanótt opna fjölmörg söfn á öllu höfuðborgarsvæðinu dyr sínar og bjóða upp á skemmtilega og fjölbreytta dagskrá frá klukkan 18:00 til 23.00. Lögð verður áhersla á að bjóða upp á óhefðbundna viðburði þetta kvöld og veita gestum nýja sýn á söfnin. Íbúar og gestir borgarinnar á öllum aldri geta notið Safnanætur fram eftir kvöldi sér að kostnaðarlausu.
Sundlauganótt
Á Sundlauganótt verður frítt í sund frá 17:00 til 22.00 í tólf sundlaugum Höfuðborgarsvæðisins. Uppákomur í laugunum verða af margvíslegum toga og munu gestir fá að upplifa einstaka og óvenjulega kvöldstund í mögnuðu myrkri. Ljós, myrkur og gleði verða allsráðandi, þar sem gestir eru hvattir til að taka þátt með því að slaka á og njóta stundarinnar.
Ljósaslóð
Ljósaslóð Vetrarhátíðar verður í lykilhlutverki en það er gönguleið frá Hallgrímskirkju niður Skólavörðustíg og niður á Austurvöll sem er vörðuð með ljóslistaverkum.
Þessi ljóslistaverk munu lýsa upp miðbæinn frá 18:30–22:30 alla daga Vetrarhátíðar. Upplifðu listaverk utandyra með þínum nánustu á þínum eigin hraða.
Verkefnastjórar:
- Björg Jónsdóttir, verkefnastjóri viðburða
- Guðmundur Birgir Halldórsson, verkefnastjóri viðburða
- Aðalheiður Santos Sveinsdóttir, verkefnastjóri viðburða
- Védís Guðmundsdóttir, verkefnastjóri vefmála
App um útilistaverk í Reykjavík
Listasafn Reykjavíkur kynnir með stolti vandað app um útilistaverk í Reykjavík. Á einfaldan og skemmtilegan hátt má fræðast um öll útilistaverk sem Listasafn Reykjavíkur hefur umsjón með í borgarlandinu, ásamt fleiri verkum, hlusta á hljóðleiðsagnir og fara í skemmtilega leiki. Appinu má hlaða niður endurgjaldslaust í snjalltæki, bæði fyrir iOS og Android stýrikerfi. Appið er bæði á íslensku (Útilistaverk í Reykjavík) og ensku (Reykjavík Art Walk), allt eftir stillingu snjalltækisins. Appið hentar bæði fyrir börn og fullorðna. Listasafn Reykjavíkur hefur umsjón með um tvö hundruð útlistaverkum í borginni. Með appinu er hægt að nálgast upplýsingar um verkin.