Dagskrá

Dagskrá í janúar 2024

20. janúar 2024 kl. 10:30-13:00

Leikið með laufum: Listasmiðja fyrir fjölskyldur

Garðskáli Grasagarðs Reykjavíkur

Í listasmiðjunni verður unnið með laufblöð plantna. Sérstök áhersla er lögð á að rannsaka laufblöð með mismunandi miðlum í þrykki, teikningu og málun. Notuð verða ýmiskonar fjölbreytt efni sem hægt er að nýta á skapandi hátt.

Listasmiðjan veitir þátttakendum tækifæri til að virkja eign hugmyndir í listsköpun á sama tíma og rætt verður um inntak sýningarinnar „Þessi djúpi græni blaðlitur: Minningar í lit“ sem nú stendur yfir í garðskála Grasagarðs Reykjavíkur.

Listasmiðjan er í umsjón Ásthildar Jónsdóttur.

Þátttaka er ókeypis og öll velkomin!

------------------

2. janúar - 2. febrúar 2024 kl. 10:00-15:00

Sýning Ásthildar Jónsdóttur í garðskála - 

Þessi djúpi græni blaðlitur: Minningar í lit.

Ásthildur vinnur oft með innsetningar í samhengi við raddir þátttakenda frá völdum stað. Þeir 39 einstaklingar sem tóku þátt í verkinu, Þessi djúpi græni blaðlitur: Minningar í lit, eiga allir einstakt samband við Grasagarð Reykjavíkur og plönturnar sem þar búa. Með verkum sínum er Ásthildi m.a. umhugað um náttúruna, umhverfið, minningar, gildismat og sjálfsmynd. Verkið hér í Grasagarðinum byggir á tengslum á milli listamanns og viðmælenda, á milli viðmælenda og áhorfenda og milli listamanns og áhorfenda. Gestum býðst að taka þátt í sýningunni með því að sauma út minningar um jurtir á dúka sem eru í rýminu. Með verkum sínum vill Ásthildur skapa aðstæður fyrir fólk til að staldra við og velta fyrir sér við hvernig aðstæður einstaklingar geti blómstrað í sátt við umhverfið sitt.

Það eru forréttindi að eiga innihaldsrík samtöl sem byggja á minningum um plöntur. Að ræða um dálætisjurtir kallar fram blik í augum viðmælandans. Þátttakendur sögðu frá plöntunum líkt og þær væru jafningjar, bæði þegar rætt var um fegurð blómstrandi blóma og gróskumikils laufs. Fyrir þeim eru plöntur ekki bara til skreytinga eða nýtingar heldur má merkja sterkt samband sem byggir á samkennd, virðingu og þakklæti. Sumar frásagnirnar benda til þess að jurtirnar séu þöglir kennarar sem miðla seiglu og aðlögun þar sem viðkvæmur línudans vaxtar og hrörnunar er stiginn. Hugmyndin um sátt og jafnvægi sem felst í djúpum tengslum manna og plantna ætti að vera öllum leiðarljós því með því að hlúa að græna lífinu í kringum okkur hlúum við að kjarna eigin tilveru. Þá skapast möguleiki á að skilja að maðurinn er hluti af einhverju stærra, hluti órofa heildar.  Það er í gegnum djúp tengsl eins og þessi sem raunverulegur skilningur á lífríkinu myndast.

Framsetningin er túlkun listamannsins á samtölunum um jurtirnar 39. Litirnir eru valdir af Ásthildi út frá lýsingum þátttakenda auk þess sem ákveðin brenglun átti sér stað í ferðalaginu frá tölvu í gegnum prentara. Með því að nota auk þess öfuga tónnálgun á svarthvítu blómamyndunum snýr listamaðurinn við hefðbundnum hápunktum og skuggum sem lætur plöntuna virka framandi. Þessi  nálgun ögrar ekki aðeins hefðbundinni skynjun heldur hvetur áhorfendur til að endurskoða skilning sinn á viðfangsefninu. Það hvetur áhorfendur til að sjá plöntuna á nýjan hátt sem er tilraun listamannsins til að umbreyta einfaldri grasafræðilegri lýsingu í sjónræna frásögn.

Ásthildur Jónsdóttir er með doktorsgráðu í myndlist frá Lapplandsháskóla í Finnlandi og í kennslufræðum frá Háskóla Íslands. http://astajons.com

 

Dagskrá 2023

Þú getur skoðað hvaða viðburðir eru í Grasagarðinum árið 2023 í þessu skjali:

Sýningar

Loftslagslabbið

Vissir þú að elsta plantan í Grasagarðinum hefur bundið kolefni sem nemur kolefnisbruna meðalfólksbíls í 3 mánuði og 24 daga?

Loftslagslabbið er sýning/gönguferð um Grasagarðinn þar sem fjallað er um loftslagsmál út frá safngripum garðsins (plöntunum) og búsvæðum og hlutverki þeirra í að minnka loftslagsvána.

Sýningin er styrkt af Loftslagssjóði og stendur til 30. september 2023.

Landkönnuðurinn

Fjölskyldugönguferðin Landkönnuðinn hér í Grasagarðinum, er í samstarfi við sænska sendiráðið á Íslandi. Við fetum í fótspor grasafræðingsins Daníels Solander sem fæddist í Svíþjóð árið 1733. Daníel elskaði plöntur og lærði um þær hjá frægasta grasafræðingi allra tíma, Carli Linnaeusi.

Daníel fannst svo skemmtilegt að skoða plöntur að hann fór í langt ferðalag á seglskipi í kringum hnöttinn, frá Evrópu til Suður-Ameríku, Eyjaálfu og Afríku. Daníel hefur lent í allskonar ævintýrum og hann fór einnig í ferð til Íslands. Það eru 250 ár síðan að Daníel kom hingað og safnaði allskonar íslenskum plöntum.

Nú getið þið prófað að vera landkönnuður eins og Daníel. Kort af gönguleiðinni má finna við inngang Café Flóru. Fylgdu kortinu og skoðaðu skiltin á hverjum stað. Landkönnuðurinn verður til 30. september 2023.

Farandsýning um villtar erfðalindir ræktaðra nytjaplantna

Sumrin 2022 og 2023 mun farandsýning um villtar erfðalindir ræktaðra nytjaplantna fara um landið með styrk frá Safnaráði Íslands. Sýningin er afrakstur samstarfs við Norræna genabankann (NordGen) og aðrar norrænar stofnanir. Sýningin er á bæði íslensku og ensku og mun vera í Grasagarðinum til 6. júní 2022. Síðan fer sýningin í Glaumbæ, svo í Lystigarðinn á Akureyri og að lokum í Ásbyrgi.

Villtar erfðalindir ræktaðra nytjaplantna eru tegundir plantna sem eru formæður nytjaplantna eða skyldar tegundir. Ólíkt nytjaplöntunum þá þurfa þessar villtu tegundir að lifa af við ólíkar aðstæður án aðkomu og viðhalds mannanna; þær vaxa því villtar í náttúrunni. Með áframhaldandi loftslagsbreytingum breytast skilyrði landbúnaðar. Til að mæta þessum breytingum mun verða þörf á nýjum eiginleikum hjá ræktuðum nytjaplöntum og þá þarf að vera hægt að leita í erfðafjölbreytni villtra plantna. Kynbótafræðingar dagsins í dag og framtíðarinnar geta leitað til þessara villtu stofna í leit að eiginleikum sem munu nýtast til að rækta fram ný yrki nytjaplantna.

Á Íslandi er fjölbreytileiki fóðurgrasa og berjategunda einkar mikill og má hér finna ættingja hveitis ásamt vallarfoxgrasi, bláberjum, jarðarberjum og kúmeni.

Langar hópinn þinn að fá leiðsögn um Grasagarðinn?

Tekið er á móti skóla-, vinnustaða- og félagahópum allan ársins hring eftir samkomulagi.

 

Bókanir og nánari upplýsingar má fá í síma 411-8650 virka daga kl. 9-15 eða með því að senda tölvupóst.

 

Leikskólar og grunnskólar geta bókað eftirfarandi fræðslubakpoka til notkunar á staðnum:

 

  • Plöntubakpoka
  • Fuglaskoðunarbakpoka
  • Lífveruleitarbakpoka
  • Smádýrabakpoka (15. maí - 15. september)

""

Grasagarðurinn er lifandi safn undir berum himni

Grasagarðurinn var stofnaður árið 1961 og er rekinn af Reykjavíkurborg. Hlutverk garðsins er að varðveita og skrá plöntur til fræðslu, rannsókna og yndisauka. 

 

Grasagarðurinn stendur fyrir fjölbreyttri fræðslu fyrir almenning og skólahópa. Markmið fræðslunnar er að nýta hin margvíslegu plöntusöfn til fræðslu um umhverfið, garðyrkju, grasafræði, dýralíf, garðmenningu og grasnytjar sem og til eflingar útiveru og lýðheilsu.

Hópur fólks að skoða blóm í Grasagarðinum

Kaffi Flóra

Kaffi Flóra býður upp á ljúffengar veitingar með áherslu á hráefni úr eigin ræktun. Kaffihúsið sem er í garðskála Grasagarðsins er opið yfir sumartímann en lokað á veturna.