Umhverfis- og skipulagssvið Reykjavíkurborgar heldur spennandi fund á Kjarvalsstöðum þriðjudaginn 26. nóvember kl. 20 um hvað ferðamáti og ferðavenjur kosta í tíma, peningum og umhverfisáhrifum. Fundurinn er í röð funda undir heitinu Loftslagsmál - liggur okkur lífið á? Markmiðið er að færa umræðu um skipulags- og umhverfismál í vítt og breitt samhengi. Allir velkomnir.
Umhverfis- og skipulagssvið Reykjavíkurborgar styður vakningu í loftslagsmálum og stendur fyrir fundum m.a. með öflugu fólki úr grasrótinni, fræðasamfélaginu og atvinnulífinu. Sviðið boðar til fundar ásamt Sigurborgu Ósk Haraldsdóttir, formanni skipulags- og samgönguráðs og Líf Magneudóttur formanni umhverfis- og heilbrigðisráðs, og setur loftslagsmál frá ýmsum sjónarhornum í brennidepil. Fjórði fundur í þessari röð er þriðjudaginn 26. nóvember á Kjarvalsstöðum kl. 20.
Hvað getum við gert?
Efnið er áhugavert fyrir borgarbúa, fagfólk og stjórnmálafólk en markmiðið er að vekja áhuga á völdu efni tengdu loftslagsmálum. Rætt er á mannamáli út frá völdum sjónarhornum um brýn efni. Á fundinum verður m.a. fjallað um:
- Hvernig endurmeta megi ferðavenjur út frá umhverfisáhrifum.
- Að í mati á losun gróðurhúsalofttegunda frá fólksbifreiðum á höfuðborgarsvæðinu árið 2030 kemur fram að nauðsynlegt er ráðast í metnaðarfullar aðgerðir. Rafbílavæðingu og aukin sparneytni bifreiða er langt frá því að vera nægjanleg til að mæta markmiðum Parísarsamkomulagsins og því er þörf á öðrum aðgerðum sem draga úr akstri til að ná settum markmiðum.
- Hvernig er fólk að standa sig gagnvart losun CO2, hvernig er það mælt?
- Fjallað verður um hvað ferðamáti og ferðavenjur kosta í tíma, peningum og umhverfisáhrifum.
- Þá verða skoðaðar leiðir til að taka upplýsta ákvörðun og lausnir í þeim málum.
Skipulag fundar
Fundurinn stendur yfir frá 20-21.45 í kaffihúsinu á Kjarvalsstöðum. Gunnar Hersveinn er fundarstjóri.
- Upphafserindi: Brynhildur Davíðsdóttir, Hlynur Stefánsson og Eyjólfur Ingi Ásgeirsson um mat á losun bifreiða á höfuðborgarsvæðinu árið 2030.
- Hópurinn sem sigraði Climathon Reykjavík 2019: Kristján Ingi Mikaelsson , Guolin Fang, Sóllija Bjarnadóttir og Kristjana Björk Barðal, fjalla um Hver eru umhverfisáhrifin af þínum ferðamáta? http://car.apis.is
- Silja Yraola formaður Samtaka um bíllausan lífsstíl ásamt Degi Bollasyni.
- Líf Magneudóttir formaður umhverfis- og heilbriðisráðs.
- Samtal fulltrúa aðila sem hafa komið fram um efnið.
- Opnað fyrir umræður á kaffihúsinu
Markmiðið er að færa umræðu um skipulags- og umhverfismál í vítt og breitt samhengi. Leitað er eftir gagnrýnni og hressilegri umræðu þar sem ólík sjónarmið og reynsluheimar mætast á málefnalegum grunni. Fundirnir hafa verið mjög vel sóttir, bæði af fagfólki og áhugafólki um skipulag og umhverfi borgarinnar og síðan eftir því hvert umræðuefnið er.
Upplýsingar - tenglar
Loftslagsmál - liggur okkur lífið á?
Er náttúran svarið? Fundur í febrúar
Frétt um þriðja fund: Eru peningarnir þínir loftslagsmál
Reykjavíkurborg loftslagsmál - heimasíða