Höfðinn

Uppbygging

Á fyrstu uppbyggingarsvæðunum er gert ráð fyrir 3500 íbúðum, tveimur grunnskólum og einum safnskóla í bland við blómlega þjónustu- og  atvinnustarfsemi við Krossmýrartorg. Hryggjarstykki uppbyggingarinnar er meðfram fyrirhugaðri Borgarlínu sem liggur í gegnum mitt skipulagssvæðið. 

Grænar áherslur

Staðsetning svæðisins er einstök. Nálægð við strandlengjuna og útivistarsvæði Elliðaárdals skapar svæðinu mikla sérstöðu í borginni. Elliðaárvogur er einn veðursælasti staðurinn í Reykjavík en þar gætir ekki norðanstrengs og Ártúnshöfðinn skýlir fyrir suðaustanátt. Miðlæg lega þess á höfuðborgarsvæðinu og nálægð við stofnæðar eru forsendur fyrir þéttbyggðu borgarhverfi sem styður við breyttar áherslur í samgöngumálum með Borgarlínu.

Leiðarljós allrar skipulagsvinnu er að styðja við markmið borgarinnar í loftslagsmálum sem stuðla að sjálfbærri þróun borgarumhverfisins. 

• Sjá meira um áætlanir

Grænt og fallegt umhverfi

Borgarhlutinn byggist upp í takt við megináherslur Græna plansins sem er víðtæk áætlun um fjárfestingu, framkvæmdir og atvinnusköpun í Reykjavík.  Elliðaárvogur, Ártúnshöfði er umhverfisvæn byggð í góðum tengslum við hágæða almenningssamgöngur þar sem áhersla er lögð á gangandi vegfarendur, hjólreiðar og rafskútur. Frábær þjónusta við íbúa borgarhlutans er sett á oddinn.

Uppbyggingin miðar að því að á svæðinu verði fjölbreytt framboð íbúða fyrir alla. Ofuráhersla er lögð á grænt og fallegt umhverfi. Stefnt er að því að hverfi borgarhlutans fari í gegnum umhverfisvottunarferli og að borgarhlutinn verði sá fyrsti sem fái  sérstaka Umhverfisvottun samkvæmt aljóðlegum stuðlum.

• Sjá meira um umhverfisvottun

Með tilkomu Borgarlínu mun Ártúnshöfði verða beintengdur miðborginni  og tengja saman  menningar og mannlífsflóru austur- og vesturhluta borgarinnar.

Breyttir tímar kalla á breytta notkun

Hugmyndir um þróun Ártúnshöfða og Elliðaárvogs hafa lengi verið á dagskrá. Árið 2015 var haldin hugmyndasamkeppni um þróun svæðisins og í framhaldi var unnið rammaskipulag sem var samþykkt í ársbyrjun 2016. Frá þeim tíma hefur verið unnið að deiliskipulagi einstakra hluta svæðisins og hefur t.d. skipulag fyrir stækkun Bryggjuhverfis til vesturs þegar verið samþykkt. 

• Sjá meira um áætlanir

Síðustu áratugi hefur plássfrek iðnaðarstarfsemi einkennt stóran hluta svæðisins. Gróf iðnaðarstarfsemi mun víkja af svæðinu en gert er ráð fyrir að léttari iðnaðarstarfsemi sunnar á svæðinu haldi sér um sinn. Fyrirhuguð uppbygging muni styðja við núverandi starfsemi á nærliggjandi svæðum. Til verður öflugur borgarkjarni við Elliðaárvog Ártúnshöfða sem mun styrkja öll hverfi í austurhluta borgarinnar.

Fjöldi íbúða og umhverfisvottun

Á svæðum 1 og 2 er gert ráð fyrir allt að 3.500 íbúðum í bland við atvinnustarfsemi og blómlegt borgarlíf. Tillögurnar hafa verið unnar í samræmi við áherslur aðalskipulags og taka mið af nútímalegum áherslum í borgarþróun og skipulagi. Skipulagsáætlanir þessara svæða verða umhverfisvottaðar af fagaðilum.