Frá vegferð til veruleika

Ársskýrsla þjónustu- og nýsköpunarsviðs 2025

Stjórnsýsla og stefnumótun

Árið 2025 einkenndist af því að stafræn umbreyting borgarinnar færðist enn skýrar úr þróun yfir í markvissa innleiðingu, eftirfylgni og stefnumiðaða forgangsröðun. Þjónustu- og nýsköpunarsvið gegndi þar lykilhlutverki, bæði sem drifkraftur nýrra lausna og sem stuðningsaðili við svið borgarinnar í því að einfalda þjónustu, bæta yfirsýn og nýta gögn og tækni með ábyrgum hætti.

Stafrænt ráð

Á árinu heyrði starfsemi sviðsins undir stafrænt ráð. Ráðið var vettvangur pólitískrar umfjöllunar um stafræna þjónustu, nýsköpun, gagnamál, net- og upplýsingaöryggi, gervigreind og stafrænt aðgengi. Það fylgdi eftir lykilverkefnum, fjallaði um heimildarbeiðnir og tók þátt í að móta forgangsröðun verkefna sem snerta íbúa, starfsfólk og innri stjórnsýslu borgarinnar.

Stafrænt ráð fundaði 16 sinnum á árinu 2025. Við lok árs sátu í ráðinu: 

  • Alexandra Briem, formaður 
  • Árelía Eydís Guðmundsdóttir 
  • Ásta Þ. Skjalddal 
  • Björn Gíslason 
  • Einar Sveinbjörn Guðmundsson  
  • Friðjón R. Friðjónsson 
  • Kristinn Jón Ólafsson  

Fyrirspurnir og erindi

Á árinu bárust og voru afgreidd erindi, fyrirspurnir og tillögur frá kjörnum fulltrúum sem vörðu meðal annars innkaup, vottun, skjalareglur, rafræn skil gagna, ráðningar, verktaka, stafræna skólaþjónustu og íbúalýðræði.

Slík mál eru mikilvægur hluti af opinni og ábyrgri stjórnsýslu. Þau gefa kjörnum fulltrúum tækifæri til að kalla eftir upplýsingum og sviðinu tækifæri til að skýra stöðu mála, rökstyðja ákvarðanir og bæta verklag.

Sérstök áhersla var á gagnsæi í verkefnavali og ábatamati. Ráðið fjallaði um fjölmargar heimildarbeiðnir, þar á meðal verkefni sem tengjast Mínum síðum, Búa og SkólaBúa, stafrænu vinnuafli, innri þjónustugátt, námsumsjónarkerfum, rafrænum beiðnabókum, greiðslulausnum og þróun vefja borgarinnar.

Með því var stafrænt ráð ekki aðeins umræðuvettvangur heldur einnig virkur þátttakandi í að velja, forgangsraða og fylgja eftir verkefnum sem eiga að skila einfaldari þjónustu og betri nýtingu fjármuna.

Stefnumótun

Þjónustu- og nýsköpunarsvið gegndi virku hlutverki í mótun og framgangi stefnumótandi mála sem varða stafræna þjónustu, gagnastýringu og nýsköpun innan Reykjavíkurborgar. Á árinu 2025 lagði sviðið reglulega fram mál til umfjöllunar í stafrænu ráði og öðrum viðeigandi ráðum og nefndum, þar sem lögð var áhersla á að tengja saman þjónustu, tækni og traust.

Stafrænn vegvísir borgarinnar var lagður fram og myndaði ramma utan um framtíðarsýn stafrænnar umbreytingar. Samhliða því var unnið að innleiðingaráætlunum fyrir stefnumótandi verkefni, meðal annars á sviði stafrænnar þjónustu, þjónustustefnu og gagnaumgjarðar. Jafnframt var verkefnaráð eflt, verkefnaval skýrt og upplýsingagjöf til kjörinna fulltrúa gerð markvissari til að styðja við gagnsæja og skilvirka stjórnsýslu.

Á árinu voru jafnframt kynnt fjölmörg umbótaverkefni, nýjar stafrænar lausnir og þróun þjónustukerfa. Reglulega var greint frá stöðu verkefna, ábatamati og umbótum á innri ferlum með það að markmiði að efla skilvirkni og stuðla að betri þjónustu við íbúa og starfsfólk.

Gervigreind varð eitt af lykilstefnumálum ársins. Stafrænt ráð samþykkti tilmæli um notkun gervigreindar hjá Reykjavíkurborg að undangengnum umsögnum sérfræðiaðila og fjallaði jafnframt um tækifæri hennar í þjónustu, veflausnum og samstarfi sveitarfélaga. Áhersla var lögð á ábyrga innleiðingu þar sem gagnsemi, mannleg nálgun, persónuvernd, aðgengi og traust fara saman.

Mikil vinna fór einnig fram á sviði gagna, skjalastjórnar og stafræns öryggis. Fjallað var um staðlaða birtingu gagna, skjalavörslu sveitarfélaga, lokafrágang Borgarskjalasafns og störf stýrihóps um eflingu net- og gagnaöryggis. Þessi verkefni styrkja grunninn að rekjanlegri stjórnsýslu, betri ákvarðanatöku og öruggari stafrænni þjónustu.

Þátttaka í innlendu og alþjóðlegu samstarfi var jafnframt áberandi. Fjallað var um sameiginlega ábendingagátt ríkis og sveitarfélaga, aukið samstarf við Stafrænt Ísland og Samband íslenskra sveitarfélaga, auk kortlagningar tækifæra í hagnýtingu gervigreindar á höfuðborgarsvæðinu. Slík samvinna styður við samræmdari, aðgengilegri og einfaldari opinbera þjónustu og gerir jafnframt kjörnum fulltrúum kleift að fylgjast með framvindu lykilverkefna, leggja mat á árangur og koma á framfæri ábendingum um frekari umbætur.

Teikninga af vegvísi sem táknar stefnur.

Stefnur

Starf þjónustu- og nýsköpunarsviðs byggir á stefnum borgarinnar og þeim leiðarljósum sem móta þjónustu, nýsköpun, lýðræði og stjórnsýslu. Árið 2025 breikkaði stefnumótunarhlutverk sviðsins þegar lýðræðismál færðust til þess og sviðið tók við ábyrgð á áframhaldandi innleiðingu lýðræðisstefnu Reykjavíkurborgar.

Lýðræðisstefna

Lýðræðisstefna Reykjavíkurborgar 2021-2030 varð þannig mikilvægur hluti af stefnuumhverfi sviðsins. Stefnan byggir á fjórum meginmarkmiðum: að hlusta, rýna, breyta og miðla. Hún leggur áherslu á að efla lýðræðislega þátttöku íbúa, tryggja fjölbreytt samráð, auka gagnsæi og gera íbúum kleift að hafa raunveruleg áhrif á málefni sem þá varða. Á árinu var lagt fram erindisbréf stýrihóps um mótun nýrrar aðgerðaráætlunar lýðræðisstefnunnar fyrir tímabilið 2026-2030. Þar er lögð áhersla á að meta árangur fyrri aðgerðaráætlunar, forgangsraða aðgerðum, skilgreina mælanleg markmið og skýra ábyrgð innan stjórnsýslunnar.

Þjónustustefna

Þjónustustefna Reykjavíkurborgar var áfram kjölfesta í starfi sviðsins. Á árinu var lögð fram aðgerðaráætlun þjónustustefnu fyrir árin 2025-2027 þar sem áhersla er á notendamiðaða þjónustu, mælingar á upplifun og markvissa eftirfylgni. Stefnan birtist í verkefnum á borð við SkólaBúa, stafrænar byggingarleyfisumsóknir, innri þjónustugátt og þróun Mína síðna.

Stafræn stefna

Áframhaldandi vinna stýrihóps við stafræna stefnu lagði áherslu á aðgengi, öryggi, gagnanýtingu og skilvirkni. Á árinu var sérstaklega horft til þess hvernig stafræn þjónusta getur aukið inngildingu, stytt biðtíma, einfaldað samskipti og gert stjórnsýslu gagnsærri. Með því að lýðræðismál og stafræn þjónusta heyra nú undir sama svið skapast jafnframt sterkari grunnur til að þróa stafrænar og óstafrænar samráðsleiðir sem styðja við lýðræðislega þátttöku.

Skjalastefna

Skjalastefna og gagnaumgjörð borgarinnar fengu aukið vægi með umfjöllun um skjalavörslu, rafræn skil, gagnabirtingu og rekjanleika. Þau mál eru ekki aðeins tæknileg heldur hluti af ábyrgri stjórnsýslu: að upplýsingar séu varðveittar, aðgengilegar og meðhöndlaðar af öryggi.

Atvinnu- og nýsköpunarstefna

Í atvinnu- og nýsköpunarstefnu eru áherslur á tilraunir, samstarf og lausnir sem skapa samfélagslegan ávinning. Þar má nefna snjalllausnir í úrgangsmálum, stafrænt borgarkort, stafrænt veski, aukið samstarf um opinbera þjónustu og nýtingu gagna til að bæta rekstur og þjónustu. Árið 2025 var því ár þar sem stefnur borgarinnar tengdust enn betur saman: þjónusta, lýðræði, gögn og stafræn umbreyting urðu hlutar af sama verkefni, að byggja upp opnari, aðgengilegri og skilvirkari borg.