Dagdvöl fyrir aldraða

Dagdvöl er stuðningsúrræði fyrir aldraða sem búa í heimahúsum. Markmiðið er að rjúfa félagslega einangrun aldraða og stuðla að því að þeir geti búið lengur heima. Í dagdvöl er boðið upp á tómstundaiðju, léttar leikfimiæfingar, fæði, hvíldaraðstöðu og aðstoð við böðun. Gestir dagdvalar eru sóttir að morgni og ekið heim síðdegis. Dvalartími getur verið frá einum upp í fimm daga í viku. Dagdvöl er rekin á daggjöldum frá velferðarráðuneyti og með greiðsluþátttöku gesta.

Reykjavíkurborg rekur dagdvöl fyrir aldraða á eftirtöldum stöðum:

  • Þorraseli, Vesturgötu 7, 101 Reykjavík. Sími 535 2740. Dagdvölin við Þorrasel er fyrir einstaklinga sem þurfa félagsskap, hvatningu, eftirlit og aðstoð við athafnir daglegs lífs. Í Þorraseli er pláss fyrir 40 einstaklinga í senn;
  • á Vitatorgi, Lindargötu 79, 101 Reykjavík. Sími 411 9450. Dagdvölin á Lindargötu er skilgreind sem hjúkrunardagvist, en þangað koma einstaklingar sem greindir hafa verið með minnissjúkdóma af völdum heilabilunar. Pláss er fyrir 18 einstaklinga í senn.

Ferill umsóknar/þjónustu

  • Þorrasel: Sótt er um pláss á staðnum. Umsækjanda er boðið að koma á ákveðnum tíma og kynna sér aðstæður í leiðinni. Hægt er að sækja um á afgreiðslutíma deildarinnar alla virka daga frá kl. 8:00 til 16:00. Deildarstjóri tekur við umsóknum. Engin sérstök skilyrði eru fyrir umsókn önnur en að hinn aldraði eigi erfitt með að dvelja heima yfir daginn svo sem vegna sjúkdóma eða félagslegrar einangrunar.
  • Vitatorg: Þegar pláss losnar er hringt í aðstandanda umsækjanda og honum ásamt umsækjanda boðið á kynningu á dagdvöl. Skriflegar umsóknir eiga að berast til deildarstjóra og skilyrði fyrir vist er að hinn aldraði sé með heilabilun.

Fyrirspurnir og/eða ábendingar

Fyrirspurnum og/eða ábendingum ber að beina til þjónustumiðstöðvar í þínu hverfi, hjá Þorraseli eða á Vitatorgi.

Þarfnast þessi síða lagfæringar?

9 + 1 =