Matjurtagarðar

Teikning af unglingi að vökva blóm.

Matjurtagarðar fyrir sumarið 2025 verða opnaðir 1. maí. Íbúar í Reykjavík geta fengið matjurtagarð til afnota. Opnað verður fyrir umsóknir 15. mars 2025.

Sækja um matjurtagarð

Hvar eru garðarnir?

Um 600 matjurtagarðar eru leigðir út á vegum borgarinnar, þar af eru 200 í Skammadal.

Matjurtagarðarnir innan borgarinnar eru á eftirtöldum stöðum og með því að smella á tengil er hægt að sjá hvaða garðar eru lausir.

Garðyrkjufélag Íslands sér um rekstur matjurtagarða í Stekkjarbakka og Grafarvogi norðan við Strandveg skv. samningi við Reykjavíkurborg.  Einnig eru íbúasamtök í Grafarholti með matjurtagarða á borgarlandi.

Skammadalur í Mosfellsbæ

Reykjavíkurborg útdeilir einnig görðum í Skammadal í Mosfellsbæ og verður búið að tæta þá þegar notendur taka við þeim.

Seljagarður

Garðar í Breiðholti við Jaðarsel eru ekki á vegum borgarinnar heldur hefur félagið Seljagarður tekið við rekstri á þeim görðum og getur fólk sótt um garð á vef Seljagarðs.

Vefur Seljagarðs
Teikning af manneskju sem heldur á nýuppteknu káli.

Hvað kostar að leigja matjurtagarð?

Leigugjöld ársins 2025 eru 7.500 kr. fyrir garðland í Skammadal (um 100 fermetrar) og 6.200 kr. fyrir garð (um 20 fermetrar). Kassar í Grafarvogi, Árbæ, Fossvogi og Kjalarnesi verða á kr. 5.000 kr. kassinn (8 fermetrar). Úthlutun garða verður afturkölluð hafi greiðsla ekki borist á eindaga.

Hvenær eru garðarnir afhentir?

Garðarnir verða afhentir 1. maí, en ef veður lofar geta garðyrkjendur byrjað fyrr.

Ókeypis fræðsla

Í Grasagarði Reykjavíkur í Laugardal er boðið upp á ýmsa fræðslu eins og í hádegisgöngunum sem eru alla föstudaga í júní, júlí og ágúst. Þær taka hálftíma og eru kl. 12.00 á íslensku og kl. 12.40 á ensku. Þær eru líka kjörið tækifæri til að spyrja starfsfólk garðsins um matjurtaræktun.

Börnum og fjölskyldum þeirra býðst að koma í garðskála Grasagarðsins og læra að sá fyrir sumarblómum og matjurtum miðvikudaginn 9. apríl klukkan 17-18. Þetta er liður í barnamenningarhátíð. Þá læra krakkarnir (og fullorðnir líka) að dreifplanta eða prikla smáplöntum. Þátttakendur fá svo að taka plönturnar sínar með heim í lok viðburðar.

Kenndar verða  brýningar og umhirða verkfæra miðvikudaginn 7. maí klukkan 17-18. Fólk má mæta með verfærin sín og fá kennslu hjá okkur. Starfsfólk Grasagarðsins kennir handtökin við brýningar á klippum, kantskerum, skóflum og fleiru. Þá verður farið yfir hvernig eigi að geyma verkfærin svo þau endist sem lengst.

Þátttaka í þessum viðburðum er ókeypis og öll velkomin.

Góð ráð og aðstaða í görðunum

Notendur garðanna geta fengið græn og góð ráð um matjurtaræktun hjá starfsmönnum okkar.

Garðarnir verða merktir. Vatn er aðgengilegt á öllum svæðum. Garðáhöld, plöntur og útsæði fylgja ekki með görðunum.