Hverfið mitt 2016

Hugmyndasöfnun og yfirferð

Hugmyndasöfnun fyrir verkefnið Hverfið mitt fór fram dagana 25. maí til 15. júní 2016. Alls bárust 911 hugmyndir inn í allri Reykjavík. Líkt og áður var öllum heimilt að skila inn hugmynd og voru hugmyndasmiðir hvattir til að skila vel unnum hugmyndum inn í samræmi við forsendur hugmyndasöfnunarinnar. Þetta var í fimmta skiptið sem hugmyndasöfnunin fór fram.

Að lokinni hugmyndasöfnun tók við mat fagteymis Reykjavíkurborgar sem samanstendur m.a af fulltrúum frá samgöngudeild og deild opinna svæða, sérfræðingum í lýsingarmálum, göngustígum og götum og garðyrkjustjóra ásamt því að þegar upp komu verkefni sem kröfðust enn frekara sérfræðiálits var haft samband við viðeigandi sérfræðinga.

Að hugmyndamati loknu fundaði hverfisráð með starfsfólki borgarinnar um mat þeirra á innsendum hugmyndum í hverfinu. Hverfisráð stilla að því loknu allt að 20 hugmyndum upp í kosningu í hverfinu, og taka við það mið af dreifingu verkefna um hverfið og fjölbreytileika bæði verkefna og þeirra hópa sem verkefnin eru líkleg til að gagnast best.