Að gerast dagforeldri

Langar þig að gerast dagforeldri? Gæða- og eftirlitsstofnun velferðarmála veitir rekstrarleyfi til daggæslu í heimahúsum.

Síminn þar er 540 0040 en hægt er að senda fyrirspurn einnig á netfang þeirra; gev@gev.is

Hvernig verð ég dagforeldri?

Gæða og eftirlitsstofnun velferðarmála veitir leyfi og hægt er að sækja um rekstrarleyfi hjá þeirri stofnun. Inni á mínum síðum er hægt að sjá hvers er krafist til þess að fá rekstrarleyfi til daggæslu í heimahúsum.

Þegar umsækjandi er búinn að sækja um rekstrarleyfi, skrá daggæsluráðgjafar á Suðurmiðstöð viðkomandi á réttindanámskeið fyrir dagforeldra.

Geta allir orðið dagforeldrar?

Ekki svo einfalt!

Það eru nokkur skilyrði sem þarf að uppfylla til þess að fá starfsleyfi.

Uppfyllir þú eftirfarandi skilyrði?

Vera orðin 20 ára

Athugaðu að ef þú ert 65 ára eða eldri er leyfi aðeins veitt til eins árs í senn.

Grunnnámskeið

Hafa lokið réttindanámskeiði eða hafa aðra menntun á sviði uppeldis-, kennslu og/eða félagsfræða.

Læknisvottorð

Skila læknisvottorði fyrir þig og fjölskyldu þína.

Sakavottorð

Skila sakavottorði fyrir þig og fjölskyldumeðlimi þína sem eru eldri en 18 ára.

Eldvarnareftirlit

Gæða- og eftirlitsstofnun velferðarmála pantar úttekt vegna eldvarna hjá Slökkviliði Höfuðborgarsvæðisins.

Umsögn

Skila umsögn frá síðasta vinnuveitanda eða umsögn tveggja ábyrgra aðila.

Tóbaksvarnir

Virða lög um tóbaksvarnir. Reykingar og neysla annarra vímugjafa er óheimil á meðan dvöl barnanna stendur.

Leikrými

Bjóða upp á leikrými innanhúss fyrir hvert barn sem er að lágmarki 3 fermetrar.

Útiaðstaða

Bjóða upp á fullnægjandi og hættulausa útiaðstöðu.

Slysatrygging

Kaupa slysatryggingu innan mánaðar frá því þú færð leyfi hjá hagsmunafélagi dagforeldra eða hjá þínu tryggingafélagi.