Verkefni og vinnuvernd

Við leggjum áherslu á að starfsumhverfið sé hvetjandi og gefandi og vinnum að því með markmiðasetningu með nemendum, auk þess sem þeir fá umsagnir um sín störf í lok sumars. 

Verkefnin

Vinnuskólinn er útiskóli og flest öll verkefni skólans snúast um umhirðu gróðurs og beða víðs vegar í borgarlandinu og á stofnanalóðum. 

Helstu verkfæri sem notuð eru í starfi eru ýmis smá handverkfæri til beðavinnu, skóflur, hrífur og hjólbörur. 

Vinnuskólinn vekur athygli á því að áfram verður haldið með það verkefni að auka fjölbreytni starfa hjá nemendum í 9. og 10. bekk. Hluta þeirra nemenda sem hafa áhuga á að starfa við annað en garðyrkju og umhirðu í hefðbundnu hópastarfi skólans mun bjóðast að starfa við m.a. aðstoð á leikskólum, inni á söfnum og á fleiri starfsstöðum borgarinnar. 

Ekki er ljóst hversu mikið framboð verður af störfum eða hver eftirspurnin verður en skráningartími mun ráða því hverjir veljast í þessi verkefni.

Markmið

Markmið með stofnun Vinnuskólans árið 1951 voru þau að tryggja að unglingar í borginni hefðu þroskandi vinnu yfir sumartímann og að ala með þeim almennar dyggðir eins og reglusemi, stundvísi og ábyrgðartilfinningu.

 

Þessi markmið hafa lítið breyst í gegnum tíðina.

Öryggismál, áhættumat og vinnuvernd

Í reglugerð um vinnu ungmenna undir 18 ára aldri er kveðið á um að leggja beri áherslu á að öryggi og andlegu og líkamlegu heilbrigði ungmenna sé ekki hætta búin. Jafnframt að vinnan hafi ekki truflandi áhrif á menntun þeirra eða þroska. 

Vinnuskólinn vinnur eftir áhættumati þar sem tilgreindar eru þær hættur sem mögulega eru fyrir hendi, bæði með tilliti til álags og líkamsbeitingar sem og vinnu með tæki eða við sérstakar aðstæður. Hjálpar þetta til við að stuðla að færri slysum og meiðslum.

Nemendur fá jafnframt þjálfun í beitingu verkfæra og tækja og leiðbeiningar varðandi líkamsbeitingu.

 

Slys

Slys er nokkur á hverju ári en fæst þeirra alvarleg. Flest tengjast þau íþróttaiðkun eða leikjum í matar- eða kaffitímum. Vinnuskólinn leggur metnað í að skapa nemendum öruggt vinnuskjól.

Öll slys sem verða á vinnutíma eru skráð svo unnt  sé að bregðast við og draga úr slysahættu, auka öryggi og viðhalda góðri heilsu starfsfólks Reykjavíkurborgar. Mikilvægt er að skrá öll atvik sem valda skaða, hvort sem þau valda fjarveru eða ekki.

Ef atvik veldur  fjarveru þarf að tilkynna slíkt til Vinnueftirlitsins og Sjúkratrygginga en skólastjóri Vinnuskólans ber ábyrgð á að slíkt sé gert. Hægt er að hafa samband við skólastjóra í gegnum vinnuskoli@reykjavik.is 

Sjá meira um vinnu unglinga á vef Vinnueftirlitsins
Teikninga af skokkara á hlaupum

Skóla- og starfsreglur

Skóla- og starfsreglum er ætlar að stuðla að festu og vellíðan nemenda í starfi. Í vinnuskóla Reykjavíkur gilda eftirfarandi reglur: 

  • Nemendur fylgja fyrirmælum leiðbeinanda og sýna samstarfsfólki og öðrum kurteisi og tillitsemi í starfi.
  • Nemendur eru stundvísir.
  • Nemendur skulu mæta til vinnu klæddir eftir veðri og með nesti við hæfi. Orkudrykkir eru ekki leyfilegir.
  • Nemendur bera ábyrgð á eigin eigum á vinnutíma.
  • Farsímanotkun er óheimil nema með samþykki leiðbeinanda.
  • Vinnuskólinn er tóbakslaus vinnustaður, þetta gildir einnig um vape og nikótínpúða. 

Aðgerðir vegna brota á reglum

Verði misbrestur á að nemandi fylgi reglum Vinnuskólans er hann áminntur. 

Fyrsta viðvörun: Við getum öll misstigið okkur. Hlustum á flokkstjórann og bætum okkur. 

Önnur viðvörun: Flokkstjóri hefur gefið aðra viðvörun, verði ekki breyting á hegðun í kjölfar hennar verður unglingi vísað heim. 

Þriðja viðvörun: Á þriðju viðvörun er unglingi vísað heim. Ungmenni er einnig sent heim hafi það áfengi eða ólögleg efni í fórum sínum á vinnutíma, beitir ofbeldi eða hefur í hótunum. 

Haft er samband við foreldra/forráðamenn í hvert skipti sem ungmenni er sent heim á vinnutíma. 

Sé ungmenni sent heim þrisvar á tímabilinu verður því tafarlaust vísað úr starfi Vinnuskólans. 

Starfsreglur Vinnuskólans (mynd)