Vika6 - 2025
Vika6 fer fram dagana 3.–7. febrúar 2025. Þemað að þessu sinni er líkaminn og kynfærin. Hér fyrir neðan eru hugmyndir og verkfæri sem sérsniðin eru að þema ársins.
Fræðsluveggspjald Viku6 er hannað af verkefnastýrum Jafnréttisskólans og teiknað af Bergrúnu Írisi Sævarsdóttur, barnabókahöfundi og teiknara. Veggspjaldið er aldursmerkt fyrir 8.-10. bekk og á því má finna ýmsa fræðslumola tengda þema ársins.
Fræðslupakkar
Hægt er að vinna með þemað á fjölbreyttan hátt, út frá aldri og þroska hvers barnahóps.
Fræðslupakkarnir innihalda kennsluhugmyndir, verkefni og annað efni tengt þema ársins.
Fræðslumyndbönd
Fræðslumyndbönd Viku6 fyrir árið 2025 eru tvö talsins og eru aðgengileg á Youtube. Myndböndin eru ætluð mið- og unglingastigi og með þeim fylgja umræðuspurningar og verkefni.
Tara Margrét, félagsráðgjafi, fjallar í sínu myndbandi um líkamsímynd og líkamsvirðingu. (11:53 mín).
Tara Margrét - fræðslumyndband
Rósa Guðbjörg, förðunarfræðingur, fjallar í sínu myndbandi um mismunandi húðtýpur og húðumhirðu sem hentar unglingum. (10:48 mín).
Youtube rás Jafnréttisskólans
Á Youtube má finna fræðslumyndbönd gefin út af Jafnréttisskólanum og UngRúv í tengslum við Viku6. Einnig má finna spilunarlista með alls kyns kynfræðslutengdu efni fyrir starfsfólk, nemendur og foreldra.
Fræðsluefni á UngRúv
UngRúv hefur tekið saman alls kyns kynfræðsluefni tengt Viku6 og birt á heimasíðu sinni.
Þar má finna bæði erlent og íslenskt fræðsluefni, leikið efni og Viku6 myndbönd Jafnréttisskólans.
Tengt þessu þema er t.d. hægt að fjalla um:
- Líkamsgerðir
- Fötlun
- Líkamsímynd
- Líkamssátt
- Staðalmyndir
- Samfélagsmiðla og samanburð
- Kynþroska og breytingar á líkama/kynfærum
- Breytingar yfir æviskeiðið
- Hárvöxt
- Húðumhirðu
- Fjölbreytt kynfæri
- Intersex
- Kynfæri á fósturskeiði
- Tíðahringinn
- Sáðlát
- Viðbrögð líkamans við kynferðislegri örvun
- Hvenær á að leita til læknis og hvert er hægt að leita
Niðurstöður unglingafundar
Unglingafundur í tengslum við Viku6 2025 var haldinn þann 5. desember 2024. Öllum grunnskólum borgarinnar bauðst að senda tvo fulltrúa á fundinn. Í heildina mættu um 50 ungmenni á fundinn og ræddu saman um kynfræðslu af miklum áhuga. Þau ræddu einnig þema næstu Viku6, inntak og áherslur.