Torg í biðstöðu | Reykjavíkurborg

Torg í biðstöðu

Torg í biðstöðu verkefnið hefur verið í gangi á torgum og almenningssvæðum í borginni frá árinu 2011. Verkefnið snýst um að lífvæða og endurskilgreina svæðin með tímabundnum lausnum. Markmið Torg í biðstöðu er að búa til skemmtilegri svæði, hampa því óvænta og vera vettvangur róttækra tilrauna með borgarumhverfið. Svæðunum er úthlutað til hópa og einstaklinga sem vilja gera tilraunir til að glæða þau lífi.

Verkefnið stendur að jafnaði yfir frá maí til september ár hvert.

  • Hlemmur
  • Frakklandsgarður
  • Þórsgata
  • Regnbogamálun
  • Káratorg

Möguleikar biðsvæðaverkefna

Biðsvæðaverkefni bjóða borgum upp á þann möguleika að gera tilraunir með tímabundin verkefni, að gefa skapandi hugmyndum tækifæri án þess að komi til dýrar framkvæmdir ásamt því að oft koma mjög óvæntar útkomur úr verkefnunum sem erfitt hefði verið að auga á fyrirfram. Borgir út um allan heim eru farnar að tileinka sér þessa hugmyndafræði sem stundum leiðir til varanlegra breytinga.

Torg í biðstöðu er í grunninn skipulagstæki og er fyrst og fremst ætlað að stuðla að sjálfbærri þróun svæða, auka fjölbreytta notkun almennings á svæðunum og þar með auka möguleika þeirra og fá almenning, íbúa, rekstraraðila og aðra hagsmunaaðila til að sjá möguleikana sem felast í svæðinu.

Torg í biðstöðu er einnig ætlað að styðja við markmið sem sett eru fram í Aðalskipulagi Reykjavíkur 2010-2030 um skipulag vistvænna hverfa og vistvænar samgöngur.

 

Á vormánuðum óskar Reykjavíkurborg eftir hugmyndaríkum og áhugasömum einstaklingum eða hópum sem taka almenningssvæði í borginni í fóstur. Verkefnið stendur að jafnaði yfir frá maí til september ár hvert og er ætlað að skapa skemmtilegri torg í skemmtilegri borg.

 
Nánari upplýsingar fást með því að senda tölvupóst á netföngin olafur.ingibergsson@reykjavik.is eða edda.ivarsdottir@reykjavik.is.
 

Sumarið 2018 

Frá árinu 2011 hefur áhersla verkefnisins fyrst og fremst verið á miðborginni. Undanfarin ár hafa forsendur verkefnisins breyst mikið samfara mikilli uppbyggingu og auknum gestafjölda í miðborginni. Sumarið 2018 verður því sú breyting gerð á verkefninu að aðaláhersla þess verður á svæði utan miðborgarinnar.

Þarfnast þessi síða lagfæringar?

5 + 6 =