Aðgengi og viðhald sorptunna
Það er mikilvægt að sorphirðustarfsfólk komist óhindrað og örugglega að sorptunnum. Það sparar ekki bara tíma við tæmingu, heldur hefur áhrif á fjölda tjóna, heilbrigði starfsfólksins og tryggir þínu heimili betri og ódýrari þjónustu. Er aðgengið að þínum tunnum í lagi?
Tunna ekki tæmd
Ef tunna er ekki tæmd skilur Sorphirðan eftir límmiða þar sem ástæða þess að tunna var ekki tæmd kemur fram. Slæmt aðgengi getur verið ein af ástæðunum en einnig ef sorp er ekki rétt flokkað. Ef of mikið sorp er í eða við tunnu er heldur ekki hægt að tæma. Eingöngu sorp sem er í tunnum er tæmt, ekki sorp sem er í kringum þær.
Viðhald sorptunna
Ílát sem sveitarfélagið útvegar eru eign Reykjavíkurborgar og sér sveitarfélagið um viðhald á þeim. Íbúar skulu ganga vel um ílátin og bera þeir ábyrgð á þrifum íláta sem þeim eru látin í té.
Tunnur sem hafa skemmst eða orðið fyrir hnjaski vegna eðlilegrar notkunar, svo sem við losun, skal tilkynna til sorphirðu Reykjavíkur.
Nokkur atriði sem gott er að hafa í huga um aðgengi
Tröppur
Það er sérlega erfitt að koma þungum tunnum upp tröppur. Skábrautir/sliskjur eru nauðsynlegar til að bæta aðgengið í tröppum. Einnig má kanna hvort önnur staðsetning sé möguleg.
Birta
Í skammdeginu skiptir góð lýsing á vinnusvæði starfsfólks við sorphirðu miklu máli.
Hindranir
Gætið þess að reiðhjól eða annað slíkt sé ekki í gangveginum að tunnunum.
Snjór og hálka
Gætið þess að moka snjó úr gangvegi starfsfólks á losunardögum og sanda eða salta í hálku.
Hundar
Á losunardögum er betra að halda hundum fjarri. Ef hundur er tjóðraður á lóð er mikilvægt að hann verði ekki á vegi starfsfólks við sorphirðu.
Hurðir
Betra er ef dyr haldast opnar meðan starfsfólkið athafnar sig. Hurðapumpur og krókar sem halda hurðum opnum meðan losun fer fram gera vinnuna auðveldari.
Staðsetning
Athugið að samkvæmt samþykkt um meðhöndlun úrgangs í Reykjavík eiga allar tunnur hvers húss að vera geymdar á sama stað.
Undirlag
Það er mun auðveldara að draga tunnurnar eftir malbiki eða hellum en grasi og möl.
Lofthæð
Of lítil lofthæð í aðkomuleiðum gerir starfsfólki erfitt fyrir og eykur álag.
Efnisval
Klæðning, dyrakarmar, gólf og veggir þarf að vera þannig úr garði gert að það skemmist ekki vegna umgengni um tunnurnar.
Læstar geymslur
Ef íbúar vilja læsa sorpgeymslum þá þurfa þeir að gæta að því að læsingarnar gangi að lyklakerfi sorphirðunnar.
Nánari upplýsingar fást hjá sorphirðunni.
Læstar tunnur
Sorphirða Reykjavíkur býður ekki upp á læstar tunnur og mælir ekki með að tunnur séu læstar. Hreinlegasta og öruggasta lausnin er að hafa tunnur í læstu tunnuskýli eða gerði. Tunnur eru eign Reykjavíkurborgar og ekki er heimilt að breyta þeim eða festa á þær aukabúnað.
Ef íbúar setja lása eða annan búnað á tunnur er það alfarið á þeirra ábyrgð. Sorphirða Reykjavíkur ber ekki ábyrgð á því ef slíkur búnaður skemmist, glatast við losun eða þegar tunnum er skipt út.