Götu- og torgsala

Hvernig sæki ég um leyfi fyrir götu- og torgsölu?

Til að stunda sölustarfsemi á borgarlandi í Reykjavík þarf að sækja um leyfi fyrir götu- og torgsölu til borgarinnar.

Götu- og torgsala skiptist í fjóra flokka:  

• Markaðssala einstaklinga 
• Dag- og nætursala í miðborg 
• Hverfasala  
• Sumarsala  

Námskeiðshald, kennsla, kynningar, sýningar, viðburðahald og minniháttar góðgerðarsala, svo sem tombólur barna og ungmenna, hvort sem er í vögnum, bílum, gámum eða undir beru lofti falla ekki undir götu- og torgsölu, en hugsanlega gæti þurft afnotaleyfi fyrir slíku. Frekari upplýsingar á www.afnotaleyfi.is   

Sérstaklega þarf að sækja um söluleyfi fyrir borgarhátíðum svo sem 17. júní, Menningarnótt og Reykjavík Pride, en götu- og torgsala fellur ekki undir slíka viðburði - torgsala@reykjavik.is.  

• Samþykkt um götu- og torgsölu í Reykjavík

Hvar er sótt um leyfi fyrir götusölu?

Sótt er um leyfi fyrir götu- og torgsölu rafrænt á mínum síðum á vef Reykjavíkurborgar.

Reikningur fyrir leigugjaldi verður sendur á þann aðila sem skráður er fyrir aðgangi að mínum síðum á vef Reykjavíkurborgar. Fyrirtæki sem sækja um verða að vera með aðgang á sínu nafni. Umsækjanda er send krafa um leigugjald í heimabanka. 

• Sjá meira um umsókn og fylgigögn

Hvað tekur afgreiðsla umsókna langan tíma?

• Markaðssala einyrkjar – 1 vika.
• Dag- og nætursölusvæði – allt að 2 mánuðir.
• Hverfasvæði – allt að 2 mánuðir.
• Sumarsala – allt að 2 mánuðir.

Skilyrði leyfis

Leyfishafi skal ávallt skila sínu sölusvæði hreinu. Mögulegar skemmdir á borgarlandi og vegsvæðum verða lagfærðar af umhverfis- og skipulagssviði á kostnað viðkomandi leyfishafa. Götu- og torgsöluleyfi er ekki hægt að framselja eða framleigja. 

Götu- og torgsala má ekki skerða öryggi og aðgengi gangandi, hjólandi og akandi umferðar. Óhindruð gangstéttarbreidd þarf að vera minnst 1,5 m og fjarlægð frá inngangi rekstraraðila með sambærilega vöru þarf að lágmarki að vera 20 m.         

Starfsemin má hvorki valda hávaða- né ljósamengun á eða í námunda við úthlutað svæði. Leyfishafa er óheimilt að stunda götu- og torgsölu annars staðar en leyfið segir til um og/eða taka meira pláss en skilgreint er samkvæmt leyfi.             

Burðarþol og munstur stétta og torga hafa einnig mikil áhrif á úthlutun en þessir staðir eru ekki gerðir fyrir mikinn þunga og/eða snúning stórra ökutækja. Reykjavíkurborg leggur því áherslu á að létta vagnana og að notuð verði besta aðferð í hverju tilfelli til að koma þeim að og frá sölusvæði án þess að vagnarnir séu dregnir af bifreið eða öðru þungu dráttartæki.

Götu- og torgsala á 17. júní, Reykjavík Pride og Menningarnótt 

Leyfi um götu- og torgsölu gildir ekki á hátíðum sem fara fram í miðborgarkjarna borgarlands, svo sem 17. júní, Reykjavík Pride og á Menningarnótt. 

Viðburðateymi Reykjavíkurborgar sér um leyfisveitingu fyrir hönd þessara hátíða. Sótt er um leyfi með því að senda tölvupóst á torgsala@reykjavik.is 

Dag-  og nætursala  í miðborginni 

Starfsár dag- og nætursölu hefst 15. maí ár hvert en hægt er að sækja um frá 15. febrúar hvert ár á mínum síðum Reykjavíkurborgar. Lágmarkstími útgefins leyfis er tveir mánuðir.     

Dagsala er heimiluð frá kl. 09:00–21:00. 

Eftirfarandi svæði innan miðborgarkjarnans eru skilgreind sem dagsölusvæði:

• Skólavörðuholt og Frakkland - 2 sölusvæði (A, C og D). Öll umferð dráttarbíla bönnuð á stæði 2. 
• Mæðragarður - 2 sölusvæði  (A, C, og D)
• Arnarhóll - 1 sölusvæði (A og C)
• Kalkofnsvegur  - 1 sölusvæði  (A og C) 
• Vitatorg - 4 sölusvæði (A, C, og D) 
• Bernhöftstorfa - 2 sölusvæði (A og C). Öll umferð dráttarbíla bönnuð.

Nætursala er heimiluð frá 22:00–05:00. 

• Hægt er að sækja um söluleyfi fyrir nætursöluaðstöðu á Lækjartorgi.  Um er að ræða 4 sölusvæði. Á svæðinu er heimilt að vera með söluaðstöðu í flokkum A, C, D og E.