Borgarstjórn Reykjavíkur boðar til opins borgaraþings um málefni barna á aldrinum 0–6 ára. Dagvistun, umönnunarbil, aðstæður í borgarumhverfi, fjölbreyttar fjölskyldugerðir og farsæld barna verða meðal annars til umræðu. Foreldrar eru sérstaklega hvattir til að mæta og skiptast á skoðunum. Börn eru velkomin og í Ráðhúsinu verður sérstakt barnahorn meðan á borgaraþinginu stendur þar sem börn eru á ábyrgð foreldra.
- Tímasetning: 11:00–13:00, laugardaginn 8. júní, 2024
- Staðsetning: Ráðhús Reykjavíkur, Tjarnargötu 11, 101 Reykjavík
Á fundi borgarstjórnar í apríl 2023 var samþykkt tillaga um að halda borgaraþing um leikskólamál og umönnun ungra barna. Jafnframt kveður ný lýðræðisstefna og aðgerðaáætlun hennar á um að haldin séu regluleg borgaraþing um ýmis málefni en þetta er fyrsta þing sinnar tegundar í Reykjavík. Mikilvægt er að skrá sig.
