Niðurstöður á talningu á hlutfalli nagladekkja í Reykjavík var kynnt í skipulags- og samgönguráði 20. maí og kom fram að hlutfallið óx.
Hlutfall negldra dekkja er töluvert hærra í ár en í fyrra og síðastliðin ár, eins og sjá má á meðaltalsdreifing á notkun negldra og ónegldra hjólbarða í Reykjavík síðastliðin 5 ár sem EFLA hefur gert. Hlutfall negldra dekkja var talið fimmtudaginn 16. apríl.
Hlutfallið skiptist þannig að 40% ökutækja reyndust vera á negldum dekkjum og 60% á ónegldum. Hlutfall negldra dekkja er nánast það sama og í síðustu talningu, 3. mars 2020 en þá var það 41%.
Í fyrra voru ökumenn fljótir að skipta um dekk en þá var einnig talið um miðjan apríl og var hlutfall þeirra ökutækja sem voru á negldum dekkjum töluvert minna, eða 31%. Fyrir tveimur árum var hlutfallið enn lægra eða 22%. Skýringarnar á því hversu hægt gekk núna að skipta er að leita í COVID 19 en sömu sóttvarnarreglur gilda á dekkjaverkstæðum eins og annars staðar.
Talningarstaðir voru Mjóddin, Kringlan, Miðbærinn við Höfnina, Háskóli Íslands við Háskólabíói. Talið er sex sinnum á ári.
Hvað er svifryk?
Svifryksmengun er ein af helstu ástæðum heilbrigðisvandans sem rekja má til mengunar í borgum. Svifryk er fínasta gerð rykagna sem eiga greiða leið í öndunarfærin. Stór hluti eða yfir 80% af svifrykinu í Reykjavík stafar af bílaumferð.
Uppruni svifryks: Rannsókn EFLA, 2017
| Malbik | 48,9% |
| sót | 31,2% |
| jarðvegur | 7,7% |
| bremsur | 1,6% |
| salt | 3,9% |
Niðurstöðurnar styðja eindregið þann grun að vægi sóts í svifryki hefur vaxið mjög á síðustu árum sem má sennilega rekja til mikillar aukningar bílaumferðar og hækkandi hlutfalls díselbíla.
Bílaleigubílar á nöglum
Ástæður þess að hlutfall nagladekkja hefur vaxið eru örugglega nokkrar. Ein líkleg ástæða er að bílaleigur afhenda bíla að vetri til á nöglum og túristum sem leigja bifreið hefur fjölgað á undanförnum árum.
Gallup gerði könnun árið 2016 fyrir umhverfis- og skipulagssvið Reykjavíkurborgar um ástæður fyrir notkun nagladekkja. Þar kom fram að eigendur tæplega 27% þeirra bíla sem eru á nagladekkjum gáfu upp ferðalög út á land og yfir fjallvegi að vetri til. Eigendur naumlega 23% bíla á nagladekkjum nefndu öryggi og eigendur rúmlega 10% bíla á nagladekkjum sögðu að nagladekkin hefðu fylgt bílnum eða að þeir hefðu átt þau fyrir. Aðrir ástæður voru t.d. hálka, búseta, vani og traust. Spurt var fyrir hvern og einn bíl á heimilinu.
Tilmæli um góð vetrardekk
Reykjavíkurborg hefur hvatt íbúa til að fjárfesta fremur í góðum vetrardekkjum heldur en nagladekkjum því það malbik sem naglarnir rífa upp er ein helsta uppspretta svifryksmengunar á höfuðborgarsvæðinu. Borgin hefur ítrekað óskað eftir heimild til gjaldtöku vegna nagladekkja og gæti það verið sterkt tæki. Það hefur ekki fengist.
Loftgæði: Hægt er að fylgjast með loftmengun í Reykjavík hér: Loftgæði.
Tengill