Húsfyllir var á fundi um uppbyggingu ódýrs húsnæðis fyrir ungt fólk og fyrstu kaupendur í Ráðhúsi Reykjavíkur í morgun. Hér er hægt að nálgast allar kynningarnar.
Á fundinum fór Dagur B. Eggertsson yfir tilurð verkefnisins sem er burðarás í húsnæðisáætlun Reykjavíkurborgar sem var samþykkt árið 2017. Borgin mun leggja til lóðir á völdum stöðum í borginni undir hagkvæmt húsnæði sem samstarfsaðilar munu þróa og byggja upp a samkvæmt ákveðnum skilyrðum. Lóðirnar verða seldar á föstu verði sem hefur verið ákveðið 45 þúsund krónur á hvern fermetra ofanjarðar.
Samstarfsaðilarnir komu síðan einn af öðrum og kynntu hugmyndir sínar með glærum. Í stuttu máli stendur til að byggja 500 íbúðir eða fleiri á lóðunum ef samningar nást við samstarfsaðilana.
Reitirnir sem um ræðir eru í Úlfarsárdal, á Kjalarnesi, í Gufunesi, í Bryggjuhverfi við Elliðaárvog, við Sjómannaskólann, á Veðurstofureit og í Skerjafirði. Deiliskipulag þessara svæða er mislangt á veg komið.
Rík áhersla er lögð á að framkvæmdir hefjist sem fyrst og gangi hratt fyrir sig.
Fundurinn hófst með léttum morgunverði kl. 8:30 en síðan hóf Dagur B. Eggertsson borgarstjóri erindi sitt kl. 9. Hann fór yfir tímalínu verkefnisins og sagði að um væri að ræða merkilega tilraun og brautryðjendastarf í húsnæðismálum. Verkefnið væri mikilvægur þáttur í húsnæðisáætlun Reykjavíkurborgar. Dagur sagði m.a. að með þessu verkefni væri Reykjavíkurborg að nota afl sitt sem landeigandi til að koma fram félagslegum áherslum í húsnæðismálum. Hann sagðist ennfremur vona að verkefnið gengi hratt og vel fyrir sig.
Fundarstjóri var Óli Örn Eiríksson verkefnisstjóri á skrifstofu eigna og atvinnuþróunar Reykjavíkurborgar sem hefur leitt starfshóp um verkefnið.
Kynning Dags B. Eggertssonar borgarstjóra
Hoffell Gufunes
Urðarsel Úlfarsárdalur
Vaxtarhús Sjómannaskólareitur
Variat Bryggjuhverfi
Abakus Bryggjuhverfi
Þorpið Vistfélag Gufunes
Heimavellir Veðurstofureitur
Hoos Skerjafjörður
Modulus Kjalarnes