Skipulagsbreytingar með skilvirkni og aukna þjónustu að leiðarljósi
Bætt þjónusta við íbúa og atvinnulíf, einfaldari og skýrari ferlar og aukið gagnsæi og hagkvæmni eru meginmarkmið nýrra skipulagsbreytinga hjá Reykjavíkurborg sem samþykktar voru á fundi borgarráðs í dag. Breytingarnar fela meðal annars í sér sameiningu á embætti skipulags- og byggingarfulltrúa.
Skipulags- og framkvæmdamál gegna mikilvægu hlutverki hjá borg sem er í örum vexti. Á fundi borgarstjórnar 4. mars síðastliðinn var samþykkt tillaga samstarfsflokkanna í borgarstjórn um skilvirkara vinnulag um viðhald og rekstur eigna borgarinnar. Skrifstofu borgarstjóra og borgarritara (SBB), fjármála- og áhættustýringarsviði (FAS) og umhverfis- og skipulagssviði (USK) var falið að endurskipuleggja eignaumsýslu borgarinnar og í dag voru samþykktar fimm tillögur um skipulagsbreytingar innan þessara eininga.
Er breytingunum meðal annars ætlað að einfalda og styrkja skipulags- og byggingaferla með styttri boðleiðum, aukinni skilvirkni, betri þjónustu og aukinni framlegð. Breytingarnar fela í sér sameiningu á embætti skipulags- og byggingarfulltrúa, tilflutning eignaskrifstofu frá FAS til USK og tilflutning verkefna frá SBB til USK.
Breytingarnar byggja á verkefnamiðaðri nálgun og gert er ráð fyrir að til lengri tíma stuðli þær að talsverðu hagræði. Leiðarljósið er aukin skilvirkni og sveigjanleiki sem og bætt þjónusta, áhersla á áhættustýringu og aukið kostnaðareftirlit.
Lesa má nánar um breytingarnar í fundargerð borgarráðs 15. maí 2025.