Opinn kynningarfundur um Sundabraut á Kjalarnesi

Ritstjórn
Húsfyllir var á fundinum og góð þátttaka í umræðum sem fram fóru eftir kynningar. Myndir/Anton Brink
Fólk í sal á kynningarfundi með skjá fyrir framan sig.

Vel var mætt á opinn kynningarfund í Klébergsskóla á Kjalarnesi mánudagskvöldið 20. október en valkostir um legu Sundabrautar eru nú til kynningar. Tilefni fundarins var að umhverfismatsskýrsla vegna Sundabrautar og drög að aðalskipulagsbreytingu eru komin í Skipulagsgáttina.

Húsfyllir var á fundinum og góð þátttaka í umræðum sem fram fóru eftir kynningar. Guðmundur Valur Guðmundsson, fulltrúi Vegagerðarinnar og formaður verkefnisstjórnar um undirbúning Sundabrautar, kynnti verkefnið og efni umhverfismatsskýrslunnar á fundinum. Andri Gunnarsson og Ragnhildur Gunnarsdóttir, frá verkfræðistofunni EFLU, sem er ráðgjafi við gerð umhverfismatsskýrslunnar, fjölluðu um vegtengingar og afmarkaða þætti umhverfismatsins og Haraldur Sigurðsson deildarstjóri aðalskipulags hjá umhverfis- og skipulagssviði Reykjavíkurborgar, fór yfir samspil framkvæmdarinnar og aðalskipulags borgarinnar.  

Að spurningum loknum gafst fólki tækifæri til að rýna gögnin í samtali við sérfræðinga á nokkrum stöðvum í salnum og kynna sér málið nánar.

Spurt um veggjald og hjólastíga

Á fundinum var farið yfir þá kosti við leiðarval Sundabrautar sem til umfjöllunar eru í umhverfismatskýrslunni; leiðir há- eða lágbrúar yfir Kleppsvík, eða göng undir, sem og leiðarval áfram og yfir á Kjalarnes. Þá var einnig farið yfir hvernig framkvæmdin myndi bæta flæði umferðar á höfuðborgarsvæðinu og samspil við fyrirhugaðar breytingar á aðalskipulagi Reykjavíkur.

Á fundinum höfðu sumir íbúa á Kjalarnesi á orði að þeir hefðu beðið lengi eftir Sundabraut, sem hafi verið ein af forsendum sameiningar við Reykjavík árið 1998. Þá var spurt út í fyrirhugaða gjaldtöku, en ekki hefur enn verið ákveðið hvernig hún verður útfærð. Sömuleiðis var spurt hvort hægt yrði að hjóla úr miðbænum upp á Kjalarnes og því svarað að gert væri ráð fyrir blönduðum göngu- og hjólastíg meðfram allri brautinni. Gestir höfðu sumir enn fremur orð á því að þeir færu fróðari og ánægðari heim. Hægt er að horfa á upptöku af fundinum hér:

Megin sjónarmið Reykjavíkur um framkvæmdina

  • Bæti samgöngur fyrir alla ferðamáta; fyrir akandi, almenningssamgöngur, gangandi og hjólandi.
  • Að neikvæð áhrif á nálæga íbúðarbyggð og tengsl milli hverfa verði lágmörkuð.
  • Hafi sem minnst áhrif á hafnarstarfsemi og leiði til hagfelldrar þróunar hafnarsvæðanna til lengri framtíðar.
  • Að mannvirki falli vel að landslagi, náttúru og byggð og staðið verði að metnaði við hönnun þeirra útfrá fagurfræðilegum sjónarmiðum.
  • Gatnamannvirki, brúarlausnir og landfyllingar verði með þeim hætti að áhrif á lífríki verði lágmörkuð.
  • Að leitað verði leiða til að lágmarka umfang og landþörf  stofnbrautar og gatnamannvirkin rýri sem allra minnst verðmæt útivistar- og náttúrusvæði, svo og framtíðar uppbyggingarsvæði.

Myndasyrpa frá fundinum

Opið fyrir umsagnir til 30. nóvember

Fundurinn í Klébergsskóla var sá fyrsti í röð opinna funda þar sem almenningi gefst kostur á að fá kynningu á framkvæmdinni, spyrja spurninga og setja fram athugasemdir. Markmiðið er að gefa fólki tækifæri til að kynna sér framkvæmdina milliliðalaust, fá ítarlegri upplýsingar og spyrja sérfræðinga um þau atriði sem helst brenna á því.

Alls verða þrír kynningarfundir vegna Sundabrautar haldnir í Reykjavík, þar sem fjallað verður um niðurstöður umhverfismats Sundabrautar og drög að aðalskipulagsbreytingu. Næsti fundur er í Laugardalnum og Grafarvogurinn fylgir í kjölfarið:

Umhverfismatsskýrslan og drög að aðalskipulagsbreytingu eru aðgengileg í Skipulagsgáttinni. Hægt er að senda inn umsagnir eða athugasemdir við hana til 30. nóvember næstkomandi.

Áréttað er að hér er um drög að að ræða sem fara nú í forkynningu áður en lögformleg aðalskipulagsbreyting verður endanlega mótuð og auglýst. Ákvörðun um endanlega útfærslu Sundabrautar í aðalskipulagi mun meðal annars byggja á niðurstöðum umhverfismatsins, sjónarmiðum sem koma fram í kynningarferlinu framundan og nánara samkomulagi milli borgar og ríkis.