Framkvæmdir hefjast á Vatnsstíg
Framkvæmdir eru að hefjast á Vatnsstíg á milli Laugavegs og Hverfisgötu en gatan verður göngugata að framkvæmdum loknum. Reykjavíkurborg og Veitur vinna saman að því að endurnýja innviði og umhverfi. Áætlað er að framkvæmdum ljúki í lok sumars.
Reykjavíkurborg jarðvegsskiptir í götunni og leggur nýtt yfirborð með hellulögnum og gróðurbeðum. Framkvæmdirnar eru í samvinnu við Veitur, sem leggja nýjar lagnir í fráveitu, hitaveitu, vatnsveitu og rafveitu.
Endurhönnnun í takt við umhverfið
Mikil uppbygging hefur átt sér stað við austari hlið götunnar. Þar er lítið torgsvæði innan lóðar sem opnast mót vestri og út í göturýmið en samráð hefur verið haft við uppbyggingaraðila varðandi hönnun þess þannig að úr verði samfella í ásýnd og yfirbragði.
Einnig verður lýsing uppfærð með ljósastaurum sem eru lægri en nú eru þarna í takt við önnur svæði í miðborginni. Gert er ráð fyrir auknum gróðri við götuna og blágrænum ofanvatnslausnum. Þær eru leið til að veita ofanvatni í jarðveg á náttúrulegan hátt, eins og með því að hafa ekki allt yfirborðið hellulagt heldur bæta við beðum sem vatni verður beint í.
Samráð og virkt samtal við hagsmunaaðila
Í undirbúningsferlinu hefur verið haft samráð við hagsmunaaðila. Áhersla verður lögð á góða upplýsingamiðlun til nærumhverfis framkvæmdarinnar á meðan þær standa yfir og allt gert til að hagsmunaaðilar og íbúar verði fyrir sem minnstum óþægindum.
Aðgengi á framkvæmdatíma
Á verktímanum verður lokað fyrir bílaumferð, en aðgengi gangandi og hjólandi vegfarenda verður tryggt allan tímann. Áhersla er lögð á öryggi vegfarenda og starfsfólks.