Fjallkonan 2007

Fjallkona árið 2007 var Sólveig Arnarsdóttir en ávarp fjallkonunnar var eftir Þórarinn Eldjárn.

Ávarp fjallkonu

Að eiga sér stað

í staðlausum heimi

eiga þar heima

eiga heima í heimi

eins og ekkert sé.

Eiga þar

varnarþing

viðspyrnu

vé.



Að eiga sér mál

í málóðum heimi

sækja í þann sjóð

sagnir

fræði

ljóð

enn og aftur

geta ekki hætt að gruna

né gleymt að muna.



Að eiga sér fjall

í flötum heimi

eiga þar skjól

skína við sól

láta sér lynda

leik regns og vinda.



Eiga þar

mark

mið

kennileiti.



Fjall

að horfa á

inn til lands

að horfa af

út yfir haf.



Fjall

kona

karl

er allt

sem

þarf

í arf.



Það er sú þrenning

sem rímar á móti menning.