Eftirlitsmyndavélar

Hvernig fer vöktunin fram?

Vöktunin getur farið fram á almannafæri eða svæðum þar sem takmarkaður hópur fólks fer um að jafnaði eins og til dæmis á vinnustöðum. Rafræn vöktun nær bæði yfir þau tilvik þar sem persónuupplýsingar eru unnar eða varðveittar, til dæmis þegar myndefni úr rafrænni vöktun er varðveitt í einhvern tiltekinn tíma og yfir þau tilvik þar sem myndefnið er ekki varðveitt en það er til dæmis sýnt á sjónvarpsskjá sem er vaktaður af starfsfólki.

Einungis er heimilt að skoða myndefni við sérstök tilefni og er það aðeins skoðað af þeim aðilum sem hafa skýra heimild til þess. Myndefni er almennt ekki geymt lengur en í 30 daga nema í sérstökum tilvikum, til dæmis á grundvelli laga eða tilmæla lögreglu, og stundum enn skemur.

Í þeim tilvikum sem eftirlitsmyndavélar eru nettengdar er gætt sérstaklega að öryggi myndefnis og tryggt að óviðkomandi aðilar hafi ekki aðgang að myndefni þeirra.

Má borgin birta myndefni af mér opinberlega?

Nei, Reykjavíkurborg miðlar hvorki efni né birtir það opinberlega nema með skýru samþykki þeirra sem eru á myndefninu.

Hins vegar er Reykjavíkurborg almennt skylt að afhenda lögreglu myndefni sem verður til við rafræna vöktun þegar svo ber undir.

Jafnframt kann Reykjavíkurborg að miðla myndefni til tryggingarfélaga eða lögreglu þegar slys hafa orðið á fólki og/eða tjón á munum og myndefni þykir hafa verulega þýðingu við rannsókn máls eða mati á því hvort um skaðabótaskylda háttsemi eða vátryggða háttsemi sé að ræða. Almennt er leitast við að tilkynna hlutaðeigandi aðilum um slíkt þegar það er unnt.

Má ég skoða myndefnið ef ég eða barnið mitt verður fyrir rafrænni vöktun?

Þau sem verða fyrir rafrænni vöktun eiga almennt rétt á því að skoða myndefnið, nema aðrir hagsmunir þyki vega þyngra.

Hægt er að óska eftir skoðun myndefnis með því að senda tölvupóst eða hringja í síma 411-1111. Brugðist er við beiðnum um skoðun gagna og eftir atvikum afhendingu þeirra svo fljótt sem verða má, og almennt innan sjö daga frá móttöku erindis. Reykjavík er þó skylt að leggja mat á myndefnið hverju sinni þegar aðgangsbeiðni berst til þess að tryggja að beiðandi eigi hagsmuni af skoðun myndefnis og ekki sé farið í bága við einkamálefni annarra þegar það á við. 

• Senda tölvupóst

Rafræn vöktun þarf alltaf að hafa skýran og málefnalegan tilgang.

Rafræn vöktun á vegum Reykjavíkurborgar fer til dæmis fram í þeim tilvikum sem hún telst nauðsynleg vegna lögmætra hagsmuna Reykjavíkurborgar eða annarra. Þá kann að vera lögskylt að viðhafa vöktun, til dæmis til að tryggja öryggi starfsfólks og þjónustunotenda. Myndavélaeftirlit getur meðal annars þótt nauðsynlegt til að koma í veg fyrir þjófnað eða eignaspjöll.

Reykjavíkurborg ber ábyrgð á rafrænni vöktun sem fer fram á starfsstöðvum borgarinnar.

Það þýðir að réttindi þeirra sem verða fyrir vöktun eru tryggð og að öryggi persónuupplýsinganna verður að vera fullnægjandi. Slíkt á sérstaklega við þegar vöktun fer fram á vettvangi fólks sem fellur undir viðkvæma hópa, svo sem fólk í viðkvæmum félagslegum aðstæðum. Reykjavíkurborg telur einnig mikilvægt að vöktun sé merkt með greinilegum hætti svo öllu fólki megi vera ljóst að vöktun fari fram hverju sinni og hvar myndavélar eru staðsettar. Reykjavíkurborg vaktar aldrei með leynd.