Innheimta fasteignagjalda
Fjármála- og áhættustýringarsvið Reykjavíkurborgar annast álagningu, reikningagerð og fruminnheimtu fasteignagjalda.
Gjalddagar
Fasteignagjöld ársins 2024, yfir 25.000 kr., greiðast með ellefu jöfnum greiðslum á gjalddögum, 31. janúar, 3. mars, 2. apríl, 4. maí, 1. júní, 2. júlí, 3. ágúst, 1. september, 2. október, 2. nóvember og 3. desember
Gjalddagi fasteignagjalda undir 25.000 kr. er 31. janúar.
Eindagi
Eindagi fasteignagjalda er 30 dögum eftir gjalddaga og reiknast dráttarvextir frá gjalddaga. Dráttarvextir reiknast frá gjalddaga ef gjöldin eru ekki greidd á eindaga. Ef eindagi ber upp á lokuðum bankadegi þarf að greiða kröfuna fyrir kl. 21:00 síðasta opna bankadag til að komast hjá greiðslu dráttarvaxta.
Vanskil
Innheimtuviðvörun er send út 10 dögum eftir eindaga og er gjaldendum gefinn kostur á að greiða kröfuna svo unnt verði að komast hjá milli- og löginnheimtu gjaldanna sem felur í sér aukinn kostnað fyrir gjaldendur.
Kröfur sem eru í vanskilum 55 dögum frá gjalddaga eru sendar í milliinnheimtu til Inkasso Momentum greiðslu- og innheimtuþjónustu. Í lok árs eru fasteignagjöld sem enn eru í vanskilum send í löginnheimtu hjá Gjaldheimtunni.
Greiðsluseðlar
Greiðsluseðlar vegna fasteignagjalda eru ekki sendir út til greiðenda fæddir 1943 eða síðar nema þess sé sérstaklega óskað. Hægt er að óska eftir greiðsluseðli á Mínum síðum Reykjavíkurborgar, í síma 411 1111 og í netfanginu upplysingar@reykjavik.is.
Fasteignagjöldin eru innheimt í netbönkum, en jafnframt er bent á boðgreiðslur af greiðslukortum eða beingreiðslur hjá öllum bankastofnunum.
Boðgreiðslur
Boðgreiðslur eru einföld og þægileg leið til að greiða fasteignagjöld. Gjöldin skuldfærast sjálfkrafa af kreditkorti viðskiptavinar. Á Mínum síðum geta handhafar Mastercard og Visa kreditkorta skráð fasteignagjöld í boðgreiðslur. Ekki er hægt að greiða þegar útgefna gjalddaga með boðgreiðslum.
Vinsamlegast athugið að fái boðgreiðslukrafa synjun um heimild við innheimtu hjá færsluhirði stofnast innheimtukrafa í banka, óheimilt er að reyna að afla heimildar vegna kröfunnar aftur.
Beingreiðslur
Flestar bankastofnanir bjóða viðskiptavinum sínum upp á að skrá greiðslur líkt og fasteignagjöld í beingreiðslur. Greiðendum fasteignagjalda er bent á að hafa samband við sinn viðskiptabanka til að skrá fasteignagjöld í beingreiðslur.
Breytingar á greiðendum
Hægt er að færa óútgefnar kröfur fasteignagjalda yfir á meðeiganda fasteignar. Til þess þarf meðeigandi að óska sjálfur eftir greiðandabreytingu með því að senda tölvupóst á netfangið fasteignagjold@reykjavik.is. Greiðandabreyting tekur aðeins til óútgefinna gjalda. Vinsamlegast athugið að eigandi fasteignarinnar ber eftir sem áður ábyrgð á greiðslu gjaldanna.
Fjármála- og áhættustýringarsvið Reykjavíkurborgar veitir upplýsingar um álagningu fasteignagjalda og breytingar á þeim í síma 411 1111 og í netfanginu fasteignagjold@reykjavik.is.
Vakin er athygli á því að eigendur geta nálgast álagningarseðla á Mínum síðum borgarinnar eða á Ísland.is.
Álagningar- og breytingarseðlar eru ekki sendir í pósti í samræmi við breytingu sem gerð var á lögum nr. 4/1995 sem tók gildi 1. janúar 2019, en þá er sveitarstjórn heimilt að senda tilkynningu um álagningu fasteignaskatts rafrænt.