Bókmenntaverðlaun Tómasar Guðmundssonar
Bókmenntaverðlaun Tómasar Guðmundssonar eru veitt ár hvert í minningu skáldsins Tómasar Guðmundssonar fyrir óútgefið handrit að ljóðabók. Dómnefnd verðlaunanna er skipuð þremur einstaklingum sem velur verðlaunahafa úr hópi innsendra handrita. Skrifstofa Reykjavíkur bókmenntaborgar UNESCO hefur umsjón með verðlaununum.
Opið verður fyrir rafræna innsendingu handrita til 1. mars 2026. Verðlaunin verða síðan veitt í októbermánuði eins og venja er til.
Hvernig tek ég þátt?
Handritum undir nafnleynd skal skilað rafrænt á .pdf-formi hér á síðunni og verður það hægt til 1. mars 2026. Handritin eru geymd á læstu svæði og eytt tveimur vikum eftir að dómnefnd hefur komist að niðurstöðu. Nafnleynd höfunda verður tryggð í þessu ferli, þar sem innsendingarnar verða unnar í aðgangsstýrðu kerfi sem tryggir að dómnefnd fær handritin einungis merkt dulnefnum.
Hver á útgáfuréttinn?
Útgáfuréttur verðlaunahandrits er í höndum höfundar eða þess forlags sem hann ákveður að starfa með.
Hver eru verðlaunin?
Verðlaunahafi hlýtur verðlaunafé ásamt viðurkenningunni sjálfri. Það er greitt af Reykjavíkurborg og eru ein verðlaun veitt árlega í vetrarbyrjun. Árið 2026 verður upphæð verðlaunanna 1.000.000 krónur.
Hvernig er dómnefnd skipuð?
Dómnefnd verðlaunanna er skipuð af menningar-, íþrótta- og tómstundaráði til eins árs í senn. Hana skipa þrír fulltrúar, þar af einn samkvæmt tilnefningu Rithöfundasambands Íslands, annar samkvæmt tilskipun Félags íslenskra bókaútgefenda og þriðji samkvæmt skipun Reykjavíkur bókmenntaborgar UNESCO, sem jafnframt skipar formann.
Sé dómnefnd á einu máli um að ekkert þeirra verka sem borist hafa fullnægi þeim kröfum sem hún telur að gera verði til verðlaunaverka, má fella verðlaunaafhendinguna niður það ár.