Bókmenntaverðlaun Tómasar Guðmundssonar
Bókmenntaverðlaun Tómasar Guðmundssonar eru veitt ár hvert í minningu skáldsins Tómasar Guðmundssonar fyrir óprentað handrit að ljóðabók. Dómnefnd verðlaunanna er skipuð þremur einstaklingum sem les öll innsend handrit og velur verðlaunahafa. Skrifstofa Reykjavíkur bókmenntaborgar UNESCO hefur umsjón með verðlaununum.
Opnað hefur verið fyrir rafræna innsendingu handrita fyrir árið 2025 og verður opið fyrir innsendingu til 1. maí 2025. Skil á rafrænu formi eru mikilvægt skref í átt að auknu öryggi, skilvirkni og umhverfisvænum lausnum, í stað skila á pappír í þríriti líkt og áður var.
Sendu inn handrit fyrir 2025 hér fyrir neðan.
Hvernig tek ég þátt?
Handritum skal skilað rafrænt á .pdf-formi hér á síðunni og verður það hægt til 1. maí 2025. Handritin eru geymd á læstu svæði og eytt tveimur vikum eftir að dómnefnd hefur komist að niðurstöðu. Nafnleynd höfunda verður eftir sem áður tryggð í þessu ferli, þar sem innsendingarnar verða unnar í aðgangsstýrðu kerfi sem tryggir að dómnefnd fær handritin einungis merkt dulnefnum, rétt eins og áður.
Hver á útgáfuréttinn?
Útgáfuréttur verðlaunahandrits er í höndum höfundar eða þess forlags sem hann ákveður að starfa með.
Hver eru verðlaunin?
Verðlaunahafi hlýtur verðlaunafé ásamt viðurkenningunni sjálfri. Það er greitt af Reykjavíkurborg og eru ein verðlaun veitt árlega í vetrarbyrjun. Árið 2025 verður upphæð verðlaunanna 1.000.000 krónur.
Hvernig er dómnefnd skipuð?
Dómnefnd verðlaunanna er skipuð af menningar-, íþrótta- og tómstundaráði til eins árs í senn. Hana skipa þrír fulltrúar, þar af einn samkvæmt tilnefningu Rithöfundasambands Íslands, annar samkvæmt tilskipun Félags íslenskra bókaútgefenda og þriðji samkvæmt skipun Reykjavíkur bókmenntaborgar UNESCO, sem jafnframt skipar formann.
Sé dómnefnd á einu máli um að ekkert þeirra verka sem borist hafa fullnægi þeim kröfum sem hún telur að gera verði til verðlaunaverka, má fella verðlaunaafhendinguna niður það ár.