Grassláttur
Reykjavíkurborg annast grasslátt í almenningsgörðum, meðfram þjóðvegum og á öðrum svæðum á borgarlandi.
Hvað er slegið?
Gras á borgarlandi, í almenningsgörðum, við þjóðvegi í þéttbýli og á grunn- og leikskólalóðum Reykjavíkurborgar er slegið. Ekki er slegið innan lóða hjá fólki og eru íbúar hvattir til að kynna sér lóðamörk.
Hver slær og hve oft?
Verktakar sinna slætti meðfram þjóðvegum í þéttbýli, en boðið er út í samvinnu við Vegagerðina. Áætlað er að þessi svæði verði slegin fjórum sinnum yfir sumarið.
Starfsfólk garðyrkjudeildar sinnir slætti í almenningsgörðum, svo sem í Laugardal, Hljómskálagarði, Klambratúni, Grundargerði, Austurbergi, Seljatjörn og í Mæðragarði við Rofabæ. Slegið er allt að vikulega.
Verktakar og starfsfólk á Þjónustumiðstöð borgarlandsins sinna slætti á öðrum svæðum, svo sem í íbúðahverfum og á grunn- og leikskólalóðum. Áætlað er að slá þessi svæði þrisvar sinnum yfir sumarið.
Hve stórt svæði er slegið?
Meðfram þjóðvegum í þéttbýli eru slegnir 113 hektarar og eru hektarar í almenningsgörðum samtals í kringum 46 talsins. Sláttur á öðrum svæðum eins og í íbúðahverfum og á skólalóðum nær yfir 312 hektara.
Alls eru því slegnir 473 hektarar af grasi á 10.802 sláttusvæðum í Reykjavík.
Hvar er búið að slá?
Hægt er að fylgjast með framvindu grassláttar í Borgarvefsjá. Þar er hægt að sjá hvaða svæði hafa verið slegin, auk þess sem hægt er að kalla fram síðustu úttekt á verki og fjölda sláttuumferða.