Þjónustu- og nýsköpunarsvið tilnefnt til UT-verðlauna 2025

Ritstjórn
Arna Ýr Sævarsdóttir, skrifstofustjóri þjónustu og umbreytinga á þjónustu- og nýsköpunarsviði, á stjórnendadegi Reykjavíkurborgar í Hörpu 2024. Róbert Reynisson
Arna Ýr Sævarsdóttir, skrifstofustjóri þjónustu og umbreytinga á þjónustu- og nýsköpunarsviði, á stjórnendadegi Reykjavíkurborgar í Hörpu 2024. Arna fyrir miðju sviði, stafirnir ÞJÓNUSTA áberandi á sviðinu, glærur á bakvið. Sitjandi gestir í forgrunni.

Þjónustu- og nýsköpunarsvið Reykjavíkurborgar hefur verið tilnefnt til UT-verðlauna Ský 2025 í flokknum Stafræn opinber þjónusta. Verðlaunin eru veitt árlega þeim lausnum sem þykja skara fram úr í stafrænni þróun og einföldun opinberrar þjónustu.

Tilnefningin byggir á öflugri og samfelldri stafrænni umbreytingu sviðsins þar sem notendamiðuð þjónustuhönnun og gagnadrifin nálgun eru hafðar að leiðarljósi. Á árinu 2025 þróaði sviðið og innleiddi fjölda stafrænna lausna sem bæta aðgengi borgarbúa að þjónustu og styðja við skilvirkari starfshætti innan borgarkerfisins.

Markmið UT-verðlaunanna er að varpa ljósi á framúrskarandi upplýsingatæknilausnir á Íslandi. Tilnefningin er viðurkenning á markvissri vinnu Reykjavíkurborgar að bættri og aðgengilegri þjónustu fyrir borgarbúa. Verðlaunin verða veitt á UT-messunni í Hörpu föstudaginn 6. febrúar.