Reykjavíkurborg samþykkir heildstæða matarstefnu
Borgarstjórn Reykjavíkur samþykkti heildstæða Matarstefnu Reykjavíkurborgar á fundi sínum í dag. Stefnan markar skýran vegvísi í matarmálum borgarinnar og leggur áherslu á að allir íbúar hafi jafnt aðgengi að hollum, næringarríkum og bragðgóðum mat, óháð efnahagslegum aðstæðum. Þetta er uppfærsla á fyrstu matarstefnu Reykjavíkurborgar, sem var samþykkt árið 2018.
Frá fæðuöryggi til fjölbreyttrar matarmenningar
Framtíðarsýn stefnunnar er að neysla, framleiðsla og meðhöndlun matar gangi ekki nærri náttúrunni, hvorki staðbundið né hnattrænt og að íbúar eigi auðvelt aðgengi að góðum mat hvort sem um ræðir bændamarkaði, matvörubúðir, veitingastaði eða grænmetisgarða.
Stór hluti losunar gróðurhúsalofttegunda í matvælaframleiðslu er vegna kjötframleiðslu, matarsóunar og að einhverju leyti flutnings á mat. Í samræmi við loftslagsmarkmið borgarinnar er gert ráð fyrir að minnka kolefnisspor og mæla árangurinn reglulega.
Stefnan er byggð upp í kringum fimm yfirmarkmið: forystu sem skilar árangri, sýnilegri matvælaframleiðslu í Reykjavík, sjálfbærni og bætta nýtingu matar, heilsusamlegan mat og fæðuöryggi og fjölbreyttari matarmenningu. Undir hvert markmið falla fjölmargar aðgerðir sem verða innleiddar í samráði við borgarbúa og hagaðila.
Garðar, hollusta og fræðsla
Meðal aðgerða er að fjölga matjurtagörðum fyrir almenning og gera þá aðgengilega í leikskólum og samfélagshúsum, þannig að fleiri íbúar, þar á meðal börn, fái tækifæri til að kynnast ræktun og uppruna matar. Að auki er stefnt að því að efla fæðutengda fræðslu fyrir íbúa um hvernig nýta má náttúrulegar afurðir sér til matar, svo sem sveppi, ber og krydd sem finnast í nærumhverfinu.
Boðið verður upp á val um grænmetisrétt í öllum mötuneytum og unnar kjötvörur falla út af matseðli í leik- og grunnskólum og öðrum þeim starfsstöðum borgarinnar sem þjónusta börn, nema í undantekningartilvikum. Æskilegt viðmið er að hámarki fjórum sinnum á ári. Alls borða í kringum 20.000 börn hádegismat í leik- og grunnskólum. Boðið verður upp á hafragraut á morgnana í öllum grunnskólum borgarinnar. Matur á vegum borgarinnar verður eldaður sem næst þeim sem neyta matarins.
Gert er ráð fyrir árlegri fræðsluviku um minni matarsóun, ætlaðri bæði borgarbúum og matvælafyrirtækjum, en matarsóun er ein af stærstu áskorunum í matarmálum nútímans. Lögð er jafnframt áhersla á að styðja við bænda- og matarmarkaði og hverfis- og götuhátíðar sem efla fjölbreytni í matarmenningu borgarinnar og skapar líf og samfélagsanda í hverfunum.
Hátt í þrjátíu þúsund máltíðir á dag
Á hverjum virkum degi eru hátt í þrjátíu þúsund manns í hádegismat á vegum borgarinnar, að mestu leikskóla- og grunnskólabörn, en einnig starfsfólk, íbúar hjúkrunarheimila og þau sem njóta máltíðaþjónustu velferðarsviðs. Þessi umfangsmikla matarþjónusta gefur borginni sérstakt tækifæri til að vera í fararbroddi í málaflokknum.
Til að tryggja framgang stefnunnar leggur borgarstjórn til að skipaður verði sérstakur verkefnastjóri næringar með skýrt umboð og ábyrgð á innleiðingu aðgerðanna þvert á svið borgarinnar.
