Reykjavíkurborg og ríki sameinast um uppbyggingu á lykilsvæðum

Kynningin fór fram á sameiginlegum blaðamannafundi þar sem farið var yfir helstu verkefni og næstu skref. 

Uppbygging á vel staðsettum svæðum 

Um er að ræða fimm uppbyggingarsamninga á ríkislóðum sem gera ráð fyrir uppbyggingu á allt að 800 íbúðum. Samkomulögin taka til nokkurra lykillóða þar sem fyrirhuguð er uppbygging með blandaðri landnotkun þar sem íbúðir, þjónusta og atvinnustarfsemi fara saman. 

Á meðal helstu svæða eru: 

• Grensásvegur 9 þar sem gert er ráð fyrir að umbreyta hluta núverandi atvinnuhúsnæðis í íbúðir og byggja við. Stefnt er að um 90 íbúðum í núverandi húsnæði með möguleika á frekari fjölgun. 
• Laugavegur 164-166 þar sem áður var meðal annars skrifstofuhúsnæði ríkisskattstjóra. Þar er stefnt að blandaðri byggð og um 100 íbúðum í núverandi húsnæði, með möguleika á auknu byggingarmagni. 
• Laugarnesvegur 91 þar sem áformað er að byggja allt að 300 íbúðir á lóð Listaháskóla Íslands, samhliða frekari þróun svæðisins. 
• Borgartún 5–7 og Guðrúnartún 6 þar sem stefnt er að auknum byggingarheimildum og fjölgun íbúða, úr allt að 120 íbúðum í allt að 220.  

• Seljavegur 32 og reitur við Mýrargötu og Ánanaust þar sem stefnt er að uppbyggingu um 90 íbúða auk leikskóla í inngarði reitsins. 

  

Á öllum svæðunum verður unnið nýtt eða breytt deiliskipulag í samvinnu við Reykjavíkurborg og er gert ráð fyrir að uppbygging geti hafist í kjölfarið og ljúki innan 36 mánaða frá útgáfu byggingarleyfis. Endanlegt umfang uppbyggingar ræðst af deiliskipulagi hvers svæðis, en ljóst er að verkefnin fela í sér verulega fjölgun íbúða á næstu árum. Um 20-30% íbúðanna verða hagkvæmar íbúðir, það er almennar íbúðir og íbúðir sem uppfylla skilyrði hlutdeildarlána, aðrar leiguíbúðir (til dæmis stúdentaíbúðir, leiguíbúðir Félagsbústaða og íbúðir fyrir eldra fólk) og búseturéttaríbúðir. 

Makaskipti á lóðum 

Samhliða uppbyggingarsamningunum var kynnt samkomulag um makaskipti á lóðum milli ríkisins og Reykjavíkurborgar. Með makaskiptunum er verið að færa land milli aðila þannig að það nýtist betur fyrir fyrirhuguð verkefni og uppbygging geti hafist hraðar. 

Reykjavíkurborg fær með samkomulaginu lóðir sem nýtast meðal annars fyrir íbúðauppbyggingu, þróun samgönguinnviða á borð við borgarlínu og starfsemi tengda borgarlandi. Á móti fær ríkið lóðir sem tengjast uppbyggingu mikilvægra verkefna, til dæmis fyrir stækkun meðferðarheimilisins Stuðla í Grafarvogi og uppbyggingu nýs öryggisvistunarúrræðis á Hólmsheiði í næsta nágrenni við fangelsið. 

Makaskiptin eru því lykilforsenda þess að hægt sé að hrinda uppbyggingu í framkvæmd á réttum stöðum og á réttum tíma. 

Þróun Blikastaðalands 

Þá var undirrituð viljayfirlýsing um þróun svæðis austan Korpúlfsstaða, svonefnds Blikastaðalands, við mörk Reykjavíkur og Mosfellsbæjar. Þar er horft til uppbyggingar á um 20 hektara svæði þar sem stefnt er að uppbyggingu að minnsta kosti 400–600 íbúða. Á þessu svæði er áætlað að minnsta kosti 30% íbúðanna verði hagkvæmar.  

Verkefnið er á frumstigi en markar mikilvægt skref í að auka framboð byggingarlóða til lengri tíma. 

Hluti af stærra átaki í húsnæðismálum 

Samstarf ríkis og borgar er liður í víðtækari aðgerðum til að bregðast við þörf fyrir aukið húsnæðisframboð. Með samningunum er verið að einfalda ferla og skapa skýrari forsendur fyrir uppbyggingu sem getur hafist fyrr en ella. 

„Þessir samningar sýna hverju við getum áorkað þegar ríki og borg vinna saman af alvöru að húsnæðismálum. Við í meirihlutanum í borginni höfum lagt áherslu á fjölbreytt framboð húsnæðis, hraðari uppbyggingu og að nýta það landrými sem fyrir hendi er, í samræmi við húsnæðisáætlun Reykjavíkurborgar. Hér erum við að leggja drög að yfir þúsund nýjum heimilum fyrir íbúa og tryggja um leið að hluti þeirra verði hagkvæmar íbúðir fyrir þá sem á því þurfa að halda. Þetta samstarf skilar fleiri heimilum, sterkara samfélagi og öflugri húsnæðismarkaði,“ segir Heiða Björg Hilmisdóttir borgarstjóri.

• Frétt á vef Stjórnarráðsins
• Glærur frá blaðamannafundinum