Breytingar á gjaldskyldu bílastæða við Hallgrímskirkju

Með breytingunni verður gjaldsvæði 2 stækkað þannig að öll bílastæði á Skólavörðuholti verða gjaldskyld, þar á meðal bílastæði sem liggur milli húss Tækniskólans og Hallgrímskirkju. 

Breytingin er í samræmi við reglur um notkun stöðureita og gjaldtöku í Reykjavík, sem og verklagsreglur um innleiðingu nýrra gjaldsvæða á borgarlandi. Áður hafði verið tekin upp gjaldskylda á hluta bílastæðanna á svæðinu, en með þessari ákvörðun verður gjaldskyldan samræmd á öllu svæðinu. Ekki er um aðrar breytingar að ræða. 

Markmið breytingarinnar er meðal annars að bæta nýtingu bílastæða á svæðinu, draga úr langvarandi stæðanotkun og tryggja betra aðgengi fyrir gesti og notendur svæðisins. Talningar á nýtingu stæðanna sýna að álag hefur verið mikið, sérstaklega á álagstímum, sem hefur kallað á frekari aðgerðir. 

Tillagan hefur verið borin undir lögregluna á höfuðborgarsvæðinu í samræmi við ákvæði umferðarlaga og hlaut hún samþykki án athugasemda. Gjaldtaka á svæðinu fellur undir gjaldsvæði 2 og verður gjaldskyldutími sá sami og á öðrum svæðum innan þess gjaldsvæðis. 

Gjaldskylda á bílastæðinu milli Hallgrímskirkju og Tækniskólans tekur gildi eftir  birtingu auglýsingar í Stjórnartíðindum og uppsetningu umferðarmerkja um gjaldskylduna.