Stendur þú fyrir Borgarhátíð Reykjavíkur 2026-2028?
Menningar- og íþróttaráð Reykjavíkurborgar auglýsir eftir umsóknum frá hátíðum sem fram fara í borginni til að bera titilinn Borgarhátíð Reykjavíkur 2026-2028. Í titlinum felst samstarfsamningur til þriggja ára með fjárframlagi og annarri þjónustu. Opið er fyrir umsóknir á Mínum síðum Reykjavíkurborgar og er umsóknarfrestur til og með 31. maí næstkomandi.
Markmið Borgarhátíðasjóðs er að styðja samfellu, framþróun og rekstrarlegan grundvöll hátíða í Reykjavík sem þegar hafa sannað ótvírætt gildi sitt hvað varðar þýðingu fyrir menningarlífið í borginni, alþjóðleg tengsl, jákvæð áhrif á ferðamennsku og ímynd Reykjavíkur auk efnahagslegs umfangs.
Hátíðir sem uppfylla eftirtalin skilyrði eiga möguleika á að vera valdar borgarhátíðir Reykjavíkur:
- eru til eflingar menningar og mannlífs í Reykjavík.
- eru opnar almenningi, aðgengilegar og sýnilegar.
- hafa verið haldnar að lágmarki þrisvar sinnum.
- eru haldnar árlega.
- hafa alþjóðlega tengingu.
- standa yfir í þrjá daga eða lengur.
- hafa faglega stjórn.
- viðhafa góða stjórnarhætti og rekstrarlegt gegnsæi.
- fullnægja kröfum um fagmennsku og gæði.
- styðja við menningarstarf í hverfum borgarinnar.
- stuðla að atvinnusköpun.
Jafnframt er litið til atriða eins og nýsköpunar, barnamenningar, aðsóknar, stöðugleika, þróunarmöguleika, tímasetningar innan ársins, möguleika hátíðanna á eigin tekjuöflun, umhverfismála, samstarfs við borgarstofnanir og þess að hátíðirnar endurspegli fjölbreytileika samfélagsins bæði varðandi gesti og þátttakendur.
Umsækjendum er bent á að kynna sér Menningarstefnu Reykjavíkurborgar 2021-2030.