Sorphirða yfir hátíðirnar
Jól og áramót eru hefðbundinn álagstími hjá Sorphirðu Reykjavíkur og einnig eru grenndarstöðvar mikið notaðar á þessum árstíma. Það er því gott að hafa í huga til að allt gangi vel fyrir sig að flokka vel allan úrgang og nýta plássið í tunnunum vel. Boðið verður upp á sérstaka gáma fyrir flugeldarusl eftir áramótin á tíu stöðum í borginni.
Þjónusta sorphirðu yfir jól og áramót
Sorphirða hefur gengið vel að undanförnu þrátt fyrir aukið magn úrgangs. Starfsfólk sorphirðunnar verður aukalega að störfum sunnudaginn 21. desember að hirða almennt sorp og matarleifar í Vesturbæ og plast og pappír í Hlíðum, Túnum og Laugardal. Síðasti vinnudagur fyrir jól er 23. desember. Vinna hefst aftur á þriðja í jólum, laugardaginn 27. desember, og verður unnið alla daga fram til klukkan 10 á gamlársdag. Sorphirða hefst aftur á nýju ári þann 2. janúar og einnig verður unnið laugardaginn 3. janúar.
Þjónusta á grenndarstöðvum um jólin
Notkun á grenndar- og endurvinnslustöðvum Sorpu eykst jafnan á þessum árstíma. Búið er að skipuleggja aukavaktir í kringum hátíðirnar. Áhersla verður lögð á að tæma gámana fyrir pappír og plast oftar en venjulega þar sem þessir flokkar eru líklegastir til að safnast upp í kringum þessa miklu gjafahátíð. Aukalosanir verða bæði fyrir jól og á milli jóla og nýárs á þessum gámum.
Gámar fyrir pappír og plast eru nú staðsettir á öllum stærri grenndarstöðvum. Við hvetjum fólk jafnramt til að nýta sér gáma fyrir glerumbúðir og málma í grenndargámakerfinu.
Gámar fyrir flugeldaleifar
Reykjavíkurborg ætlar að bjóða upp á gáma fyrir flugeldarusl á tíu grenndarstöðvum um alla borg. Gámarnir verða settir upp dagana fyrir gamlársdag svo þeir verða klárir til þess að taka á móti flugeldaruslinu á nýársdag. Frá og með 2. janúar verður tekið á móti flugeldaleifum á endurvinnslustöðvum Sorpu á hefðbundnum opnunartíma. Sem fyrr fara ósprungnir flugeldar fara í spilliefnagáma á endurvinnslustöðvum Sorpu.
Gæta þarf vel að því að það leynist ekki glóð í tertum eða öðrum flugeldum og gefa þeim tíma til að kólna áður en þeim er hent í gáminn.
Staðsetningarnar eru þessar:
- Vesturbær – grenndarstöð við Hofsvallagötu (Vesturbæjarlaug)
- Miðborg - grenndarstöð Eiríksgötu (við Hallgrímskirkju)
- Hlíðar - grenndarstöð við Flókagötu (Kjarvalstaði)
- Laugardalur - grenndarstöð við Sundlaugaveg (Laugardalslaug)
- Háaleiti-Bústaðir - grenndarstöð við Sogaveg
- Breiðholt – grenndarstöð við Austurberg
- Árbær/Selás – grenndarstöð við Selásbraut
- Grafarvogur – grenndarstöð í Spöng
- Grafarholt-Úlfarsárdalur – grenndarstöð Þjóðhildarstíg (við Krónuna)
- Kjalarnes – við grenndarstöð
Gleðileg úrgangsjól og takk fyrir að flokka!