Menningarnótt er fjölskylduhátíð

Ritstjórn
Heiða Björg Hilmisdóttir borgarstjóri fór yfir dagskrá Menningarnætur á blaðamannafundi á Ingólfstorgi.
Heiða Björg Hilmisdóttir borgarstjóri fór yfir dagskrá Menningarnætur á blaðamannafundi á Ingólfstorgi.

Blaðamannafundur var haldinn á Ingólfstorgi í blíðskaparveðri í morgun til að kynna dagskrá Menningarnætur og fara yfir öryggis- og aðgengismál.

Heiða Björg Hilmisdóttir, borgarstjóri, fór yfir helstu atriði hátíðarinnar. Fulltrúar frá lögreglunni, slökkviliðinu, strætó, forvarnarsamtökum og frístundamiðstöðvum voru á staðnum, til að fara yfir öryggis- og aðgengismál. 
Viðbragðsaðilar á blaðamannafundinum á Ingólfstorgi
Viðbragðsaðilar ásamt borgarstjóra á Ingólfstorgi í morgun.
Dagskrá Menningarnætur verður stytt í ár, hún verður sett klukkan 12.30 við Þjóðleikhúsið og lýkur klukkan 22.00. Þessi breyting er gerð til að undirstrika að þetta er fjölskylduhátíð þar sem lögð er áhersla á að fjölskyldan komi saman í miðborgina og fjölskyldan fari saman heim.  

Minningarstund á Arnarhóli

Í lok tónleika RÚV á Arnarhóli verður einnar mínútu þögn til að minnast Bryndísar Klöru Birgisdóttur. Að lokinni minningarstund verður flugeldasýningin sem tileinkuð er Bryndísi Klöru og öllum ungmennum sem orðið hafa fyrir ofbeldi.