Fjórar leik- og grunnskólalóðir og leiksvæði endurgerð
Alls verða þrjár lóðir við leik- og grunnskóla Reykjavíkurborgar endurgerðar á árinu. Til viðbótar verður leiksvæði við Skerplugötu endurgert. Áætlaður kostnaður við þetta er 165 milljónir króna.
Endurgerð skólalóða felur í sér heildar endurskipulagningu lóða og endurnýjun frá grunni. Aðgengi fyrir alla, lýsing, leiktæki, yfirborðsefni og svæði fyrir hugmyndaleiki barna verður bætt. Helstu verkliðir eru jarðvinna, landmótun, hellulögn, frágangur gras- og gróðursvæða, útskipti fallvarnarefna og frágangur kringum leiktæki.
Endurgerð lóða er oft skipt upp í fleiri en einn áfanga en þær leik- og grunnskólalóðir sem verða endurgerðar á þessu ári eru:
- Leikskólinn Hálsaskógur/Kot – Heildaráfangi
- Leikskólinn Borg-Arnarborg - 2.áfangi
- Austurbæjarskóli - 1.áfangi
Stefnt er á að hefja framkvæmdir í maí/júní og áætlað að þeim ljúki í október/nóvember 2025.
Opið leiksvæði við Skerplugötu
Framkvæmdin felur í sér endurgerð á opnu leiksvæði sem stendur á borgarlandi við Skerplugötu.
Hvað verður gert?
- Endurnýja á yfirborð leiksvæða, það er fjarlægja perlumöl og setja hellur, gras, gervigras og fallvernarefni í staðinn.
- Leiktæki verða endurnýjuð.
- Lögð er áhersla á að gera leiksvæðið aðgengileg fyrir öll og bæta lýsingu sé þörf á því.
Framkvæmdin styður við stefnur Reykjavíkurborgar um aðgengi fyrir öll og borg fyrir börn. Gert er ráð fyrir að hægt verði að hefja framkvæmdir í maí og áætlað að þeim ljúki í ágúst 2025.
Borgarráð hefur nú heimilað umhverfis- og skipulagssviði að bjóða út þessar framkvæmdir. Áætlaður heildarkostnaður við endurgerð leikskólalóða er 100 milljónir króna, við endurgerð grunnskólalóða 50 milljónir króna og 15 milljónir við opna leiksvæðið.